月入 辭職 工作 公司 同事 人生 電話 自由 時間 青春 職場 網民熱話

打工20幾年 月入$20,000 勝在無結婚生仔 無奢望買到樓 | 網民熱話

社會熱話

廣告

網民熱話・月入】做香港人,除非你本身有個錢,如果唔係,千祈唔好講咩理想。如果你想講理想,就唔好怨無呢樣無果樣。

撰文:不覊 | 圖片:unsplash

讀「神」科難揾食

大學修讀神科,邊科就唔好提嘞,即係果啲讀完好似咩都做得但其實又好似咩都唔做得果科。查實呢樣嘢,唔係而家啲後生仔先至有,我個年代,神科早已存在。

我好記得當年從商的表哥知讀我入到 U ﹐打電話俾我 :「吓 !乜你讀呢科呀?將來打算做乜先?無嘢好做喎!!唉,無謂晒時間,早啲出社會搵食好過啦。」

講返我當年讀大學,其實都唔易喎,唔似而家有錢就讀得果隻,我會考都接近30分架。當年我好天真咁認真,選擇自己興趣的科目去學習先至係對的人生態度。

初教中學月入兩萬幾

又咁講,以當年嘅就業環境睇,大學生要搵份似樣啲工作,人工唔太差的,其實一啲都唔難。

我好似就搵到間中學教書,叻就唔係好叻,所以自己都係搵咗間Band 3 學校去教,我好記得間中學喺沙田,我當然係教啲閒科啦。月入都成兩萬幾,對於一個後生來講,算好好喇 。

90年代初,其實真係唔太愁,只係當年自己教咗兩三年書,開始覺得人生日復日年復年,不斷重複教同一樣,開始有啲悶。

嗱,我係好誠實,老實講我真係唔係好有熱誠同使命,我唔似有啲同事口成日講要作育英才,只係我唔太抗拒教書,同啲細路仔相處,但你講好有教育理想咩,咁就一定唔係。

轉行雜誌社

亦有可能係因為咁,我教教吓真係幾沒趣。咁咁啱當時有個同學同我講,佢間公司請人,問我有冇興趣過去做。

同學間公司係雜誌社,我本身識影相,查實仲影得幾靚架,我仲可以兼埋做記者,因為點都叫識幾隻字。

心諗,見吓世面都好喎,反正書隨時有得教。於是又走鬼咗去雜誌社做。

老實講,做雜誌社又真係幾得意,可以影吓同訪問唔同人,接觸面廣好多,當時真係做得幾開心架。

金融風暴又轉工

人工呢,就一定唔可以同教書比,當年入職萬鬆啲,據聞而家啲新丁都好似係呢個人工咁上下,諗返都真係幾悲。

做吓做吓,雖則呢行好玩,見識多,但諗落其實前途真係唔太好,開始有意識要轉行,係公司開始裁員,當時係97金融風暴,我知好多行都難撈。突然間覺得自己唔細,係咪時間要搵過份穩陣啲工呢?

果時又開始留意吓其他工,我知自己係個無乜方向之人,於是又諗,不如是但搵間學校教返書先,點知,出咗來就原來好難入得返,果時開始要求多咗,好多學校要請有教育文憑的,我冇,但如果要我讀返,一來要時間金錢,二來我又真係唔太有熱誠。最終我都係無入返行。

心態但求有份工

但就已經決定咗轉行,唔再做雜誌了。我後來去咗間中小型公司做文職,因為當時真係唔太易搵工,求其有公司請就做住先。做的亦唔係好專嘅工作。

查實當時諗法係,我唔介意,但求有份工,當我放咗工,我就可以做自己鍾意做的事,就係玩話劇。我知做戲係唔會搵到食,我亦無打算因此搵食,呢個只係興趣,只係想工餘做自己想做的事。

呢個就係我

我自問無乜事業心,我老豆老母成日話我無出身,讀枉書,唔似做護士的家姐同做會計師的阿哥,係個搵到食的專業人士,但我只能說,呢個就係我。

結果,我響職場上左輚右轉,轉吓工又加上有啲公司執笠,20多年下來,轉過六、七份工,都唔係咪大公司,亦唔係咩高職位,上個月30號出糧,我月入$19,850。

無可能奢望買樓

而早我兩年出世同遲我們的年出世的家姐同細佬,月入 5、6 萬人工,佢地兩個都早幾年買咗樓。

而我,一直住響黃大仙老家公屋。眨吓眼,原來自己已經年過40,人到中年,查實真係積蓄唔多,亦無可能奢望買到層樓。結婚生仔?更加係冇可能的事。