咩人去咩公司做 細公司注定冇嘢學 網民：連上司都冇咩見識 ｜網民熱話

撰文：麗爾｜圖片：電視截圖

樓主做開大公司，該公司有地獄之稱，好多人都話頂唔順，但樓主覺得自己頂得順，想搏下去細公司，希望更好嘅發展，點知「搏得一身冷汗」。

兩份工都未做夠三個月就失望到走，原因如下：

1.做細公司好hea

樓主表示，比起之前做嘅大公司hea，但hea唔係離職嘅主因。

2.學唔到嘢（死因）

樓主認為細公司嘅人好普通，形容啲員工「好mk」，講哂粗口，連上司都係依啲人，感覺上冇咩見識。令樓主大開眼界，原來依啲咁嘅人都做到manager。

雖則細公司都有正常嘅人，但都係冇以前接觸嘅同事咁醒目、有見識及eq高。完全喺佢哋身上係冇嘢學到。

3.唔教你嘢

樓主表示自己兩份工一入去都受到老闆嘅欣賞。

第一份工樓主曾被老闆公開讚咗幾次，之後個上司就唔教佢嘢，直程係所有嘢都唔教，程度有啲似連廁所都唔話你知喺邊。

老闆係好開心見到樓主做到嘢，基本上老闆要求嘅工作範圍係above expectation。

第二份工，樓主表示自己能力震驚老闆，佢認為樓主過咗proba 先做到嘅嘢，第一日已經做到。之後上司已經諗緊點整走樓主，而佢亦如願以償迫走咗樓主。

離職嘅原因分為兩個：

一、覺得間公司太垃圾，會整花cv。樓主形容公司多「廢柴」，唔知做唔做到落去，因為佢地激到個老闆話要賣盤。

二、學唔到嘢之餘，同事仲要問返樓主轉頭點做到，樓主表示「有錢都唔想袋佢袋」。

由這些經驗樓主分析出只能可以喺外企大公司發展， 而之前兩間在細公司工作嘅經驗，樓主冇寫落cv。

網民表示搵工都係睇際遇，因為入大公司一樣可以冇人教俾人玩，，亦可以養好多冗員好優悠；而細公司都可以人事簡單推心置腹，多嘢學上位快。

講到底都係睇待遇和前境，如果入大公司一世冇發圍，都係賺得個虛榮，如果都係員工仔。

不少人同意樓主嘅講法，亦表示大公司之間都有高下之分。有啲事情係grade a公司做係好普通嘅水平，去到grade b公司做同樣嘅嘢 有人會覺得大開眼界。
所以初入行真係要花心思入grade a公司，打好基礎之後啲路都好行啲。不過始終都要自己肯做肯學。

另外，大公司有official training，而好多時細公司咩training 都冇。

而大公司就算冇人肯教，都有training 同公司standard頂住，加上大公司通常做大生意，做錯嘢間公司好大獲； 而細公司直程冇皇管，做錯事都唔多影響到間公司，因為反正冇人識冇人care。

出去見識下絕對係好事，可以感受下自己公司條件適唔適合自己。

不過都有網民都有提醒大家，一個人如果係勁，去邊都係勁，被老細睇得起，根本唔使放上司在眼內，因為你會好快過咗佢；個老細肯出大手筆，值得埋佢身；想跟你學野的同事，唔使專登教，學到佢就學，你唔會少忽肉，仲可能可打好關係添。