【網民熱話】譚仔阿姐都搵$15,000 網民：買唔到樓真係要自己檢討下
撰文：浩德 ｜ 圖片：新傳媒資料室、討論區截圖｜資料來源：香港討論區
譚仔阿姐人工都$15,000
人人都想上車，但唔係人人都上到車。去年股市開始動盪，加上中美貿易戰影響，股市樓市不穩。
雖然農曆年過後有說樓市現正出現「小陽春」，但有新高交易的同時，亦繼續有劈價個案。
有網民就以「譚仔呀姐人工都$15,000，班癈青仲話買唔起樓」為題開帖發文，指近日發現譚仔招聘最低職位阿姐嘅人工都有$15,000，認為「廢青」聲稱買唔到樓係因為唔努力、唔儲錢！並認為只要肯努力，要上車一啲都唔難！
男女友都做譚仔 已月入$30,000
樓主指：「假設男女友都做譚仔，已經月入$30,000 ，認真儲錢，一個月共儲$18,000一年已經儲到22萬
儲三年已經有66萬存款，夠曬比首期買上車盤有凸
反觀嗰班死廢青，冇能力，又唔努力，又唔儲錢，就喺度埋怨政府唔送層樓比佢哋
400萬至600萬樓睇唔上眼，1,000萬樓先睇得上眼 就好似唔揸日本車，死都要揸法拉利
一年去四五次旅行，日日飲$40喜茶，間中的士出入，放工就去酒吧摸酒杯底，生日要送份一萬蚊禮物比（俾）自己
分分鐘連佢哋老細都冇咁大洗（使）威水囉，巴閉囉，抵死你班死廢青
網民：買唔到樓真係要自己檢討下
部分網民同意樓主說法，認為「廢青」只顧享樂，不努力儲錢，買不起樓唔應該怨天尤人，因買唔到樓「絕對係自己問題」！
「就算唔做飲食咁辛苦，求其搵份$15000文職 hea 工也不難，人工高先難」
「其實後生仔正正常常做幾年，人工到二萬蚊好平常 情侶一齊夾錢買樓真係易過借火」
「買唔到樓真係要自己檢討下」
難過銀行貸款壓力測試
亦有部分網民比較貼地，指出若「現實搵2人合共搵$30,000 一早鎖定資助房屋」
更有心水清網友指，若根據樓主的前設，「首先你要有條女！第二係你唔洗交租或租版間房或有供屋住！
第三做衰仔唔俾家用！」否則，正常根本沒可能可以月儲到$18,000，而且也有多位網民提到，以兩人月入只有3萬的入息，很難過得銀行貸款的壓力測試。
「66萬有什麼上車盤？有計過之後要月供多少嗎兩個人月使$12,000！？一定不用交家用或者租樓的」
「你未計通脹同壓力測試，五後後收入會有幾多升幅？壓測過唔過到有無計過？
兩人合共月儲18000唔係有問題，不過學你講用加法增長絕對追唔上未來通脹率，三年太拉車邊」
對於網民的質疑，樓主以置業貸款計程算的計算結果來引證儲到66萬是可以買到400萬的樓。
更指「大把朋友400萬上車，都唔使66萬」並指壓力測試或真有機會不過，但「只計基本雜費點會唔夠」，堅持己見。
最後有網民直言，「若然負擔得起又不需節衣縮食，可以擁有屬於自己的地方當然是最好的選擇，問題是15,000的人工，勉強去供樓又是不是合適呢？」
