網絡23條的優點 (搲爆頭之下諗)

咁究竟網絡23條係咪真係咁負面呢？小編好盡力咁諗，終於諗到幾個比較似樣的「優點」，嗱嗱嗱，至少應該唔洗再聽到梁特首唱歌，因為首《喜歡你》已經搞到一頭煙，記得交齊稅啦！

大媽唔準開喇叭

經過旺角西洋菜街，除咗好多街頭表演外，仲會成日見到唔少大媽，開住大大個喇叭忘形地跳舞，唔理個世界，唔理旺角係幾咁多人多廢氣。如果立咗法，佢地都繼續跳靜音舞的話，咁小編就只能說：「我輸了……」(歌詞都犯法)

「女神棍」現形

見到女神張Profile Pic幾靚女，一於約佢出來行下街，唔洗又過Lonely Christmas。出到嚟，女神BB呢？望極都見唔到想見的女神身影，結果一個同女神張相完全相反的走來相認。偷圖扮女神？可恥！23條之後冇得偷圖，「神棍」仲唔速速現形？

善長冇得開金口

小編睇籌款節目都會好擔心，因為每次都有善長人翁開金口高歌幾曲，上次前司長周一嶽就完美示範咗，慈善籌款之餘娛樂十足，不過小編聽完都會洗腦，完全諗唔起首原唱。如果有23條，我諗冇人敢唱啦掛，要至少俾六個版稅，捐左佢好過啦！

唔洗成街都係Elsa

好多父母都鍾意貪得意將小朋友打扮成卡通公仔，女孩子又鍾意扮公主(不過真係有公主病)，一街都係Elsa，不過此景不再啦，23條話唔準Cosplay呀，真係Let it go, let it go……

畢業只準唱校歌

學生哥畢業，畢業禮係會唱幾首催淚歌，《友共情》、《友誼萬歲》個啲一定走唔甩(嗚呀，小編已老了)，有23條的話，一於齊齊唱校歌，有歸屬感呀嘛！

佳節耳根清靜

又到聖誕，又到聖誕！行街周圍都聽到隻經典聖誕歌《Last Christmas》，又係時候大出血啦！如果以後冇得播歌，連聖誕過咗都唔知，咁應該可以慳唔少！新年時冇得聽Sam Hui的《財神到》，冇哂節日氣氛下，隨時連利是都唔洗派。