老闆 請食飯 budget M記

老闆話完請食飯又要每人夾$200 可能budget係預你食M記

社會熱話

廣告

【請食飯】一年一次為答謝員工嘅努力,多數老闆都會請食飯。近排出現有老闆覺得食嘅嘢太貴,話要大家每人夾返200蚊⋯⋯其實老闆「請食飯」嘅定義係咩?依家聽落似「部分質助」乍喎⋯⋯

撰文:麗爾|圖片:電視截圖

事主:

我做細公司 因為聖誕新年個排好忙 所以都冇乜慶祝活動或者食餐飯
最近因為空閒返啲 老細就同我地講見我地都好辛苦 同埋又好耐冇一齊出去食飯 就話請大家食餐飯~
仲叫我地自己簡餐廳 簡完佢都話OK
其實佢一向都好少話請食飯之類 咁講真老細無必要老奉請你既 所以見佢話請我地都覺得佢好好
點知食完之後佢係公司group度提我地每人夾返200俾佢, 佢話我地over咗佢budget
我地8個人埋單兩千頭左右

大多數人嘅反應係: 8個人兩千頭都要夾?比盡你一年一次,叫每人要夾$200,唔係呀嘛!

到底老闆你個budget係幾多?

假設事主佢哋當時係食咗$2,300。8個人要各俾返$200。

$2,300- $1,600=$700/8=$87.5。

即是Boss打算請每人約$87.5。

打算請員工食$100內但變咗食成3舊,over budget所以要回水。

「食飯老闆老奉請?」

唔係老奉嘅,同你做人情一樣,講心㗎啫。

問題係話咗請,之後要夾錢,如果之後唔夾返錢會被視為老奉,講唔通。

個人都有試過,兩位同級經理帶住幾個同team嘅同事出去食飯,到埋單嗰下經理A識做地諗住佢埋單(平時為人大方都鍾意得閒請吓下屬食飯),但經理B爭住埋。

然後經理A客氣地講句:「多謝!」

返到去office 5分鍾我哋就收到經理B嘅電郵:「每人$50,謝謝。」

咁剛才埋單係咩意思呢?

我諗咗好耐,係咪想儲信用卡積分⋯⋯

而唔少網民都有相似經驗。其中一位表示對上一次聖誕聚餐,老闆表面好識相地話請大家食,同樣叫同事們自己揀好就okay。

聽落去好民主,但俾同事揀完俾咗張list老闆後,老闆根本就無跟張list買⋯⋯

最後老闆叫咗嘅食物,望落去成個感覺係你飽咪夠囉

網民只用五個字去形容:大件夾抵食

有網民表示同事升做team leader都有請成兩圍人食自助餐。

唔通事主老闆只想每人請食一碟頭飯?以後有啲咁嘅飯局就真係請都唔想去,自己同傾得埋嘅同事食就仲開心。

另外有人提到自己公司,年年都係有個女同事話公司食飯想聖誕前幾天去,年年老闆問大家提議去邊到食,但年年也是呢位女同事想食的地方,次次都是呢位女同事屋企附近。

覺得去嚟都嘥氣,食完搭車回家好遠,仲衰過平時放工撘車回家,所以寧願留在公司唔去,結論係「做女好過做仔」。

網民留言:

 

「因為你老細覺得你班友呢一年嘅工作表現(不值)二千頭,所以稍微暗示下提醒你哋下年要做番個相應(不值)出來!」

「我做嗰啲細公司,真係老細克薄,孤寒性情,相比而家做上司藍籌大公司真係冇得比。無論 薪酬福利 工作時間,工作專業,都比细公司 多X倍以上!」

「連雞脾打人牙骹軟呢啲入門級權術都唔曉用, 明明話係請食飯, 之後又要員工夾返錢, 食呢餐飯真係背脊骨落啦! 著眼點並唔係餐飯, 而係言而無信, 請一餐飯慰勞員工都做到咁肉酸, 跟著呢條算死草都係無前途架啦, 係時候諗諗轉工啦。」