職場如戰場 要數就要搶

社會熱話

廣告

辦公室長期充斥着明爭暗鬥,那麼分行呢?可以告訴你,肯定是更血腥、更蠻夷和更暴力。有些同事天生注定是吃這行飯的——他們心狠腿辣,從不腳軟,尤其擁有一對長腿。

大家經過分行時,有留意大部份的大堂職員都擁有長腿嗎?我相信HR請人時,肯定有經過嚴格篩選——長腿優先。那麼,長腿有什麼功用?用來吸引麻甩客戶?錯喇,咁樣諗,思想實在太淫穢。長腿當然是用來鬥快跑啦!

每日分行都會上演10米短跑比賽,當teller同事打晒眼色,準備refer個客比其他同事,那些同事已經做好”On Your Mark”,待teller同事開口,就已經”Get Set、Go”衝了過去,同時有數個短跑選手進行比賽是非常常見的。至於偷步?Sorry ,分行無裁判,老闆只睇成績。

搶贏,開到單,就是Champion。

或者再具體啲,大家有無試過去魚池餵錦鯉?一個被refer的客,其實同一粒魚餌無分別。當他被扔入魚池,發覺自己變成一粒魚餌時,身邊周圍已圍著一堆堆張著嘴的飢餓錦鯉。其實不難理解,魚尚且為生存搶食,人何嘗不是?

更絕望的是,錦鯉怎麼吃也吃不飽,同事怎麼跑數也跑不完。

赤裸裸的「明搶」說完了,那麼「暗鬥」呢?絕對更精彩、更峰迴路轉、更高潮迭起!

《孫子兵法》有云,「攻其無備,出其不意」。離開自己的位置是最危險的,因為當你離開自己地盤,埋伏就來了。

小妹試過多次費盡唇舌向客戶極力講解計劃內容,他們都表示需要考慮一下,Okay,我從不強人所難,只好揮手送別。但不知是否時辰不夾,每當我去廁所放水,又或者斟水,甚至食飯時,那些客戶總會回心轉意,「叮」一聲的突然想通,回來找我。至於找不到我,點算?呢方面絕對不用擔心!我那班熱心好客的同事自然會替我招呼他們,順便把生意袋袋平安。

如果單是以上情況,只能怪自己無運,「唔係我財,唔入我袋」。可惜,做我們這一行,變數實在太多了,即使已close deal,一日張單未effective,一日仍有變數。

可能是因為同事的長腿極具天賦,加上長期練習「撩陰腿」,「撬牆腳」的功力實在深厚,非小妹的三腳貓功夫可匹敵。

「陳生,點解你取消咗張單嘅?係咪有咩問題啊?」

「溫小姐啊?無啊,我嗰日搵你唔到,有嘢想問。不過你個同事幫我搞掂咗,重新做過啦。宜家無問題㗎啦,唔該晒你啊!」

See,我同事對我幾好,連我個客都照顧有加。小妹以前見朋友被人「撬牆腳」,喊到要生要死,我不明白。呢一刻,我終於感受到被人背叛搶掠的感覺,原來是這麼無奈、心痛和憤怒。

在弱肉強食的分行世界,你不搶人,人自會搶你。看來,如果不是靠幾啱傾的Ernest偶爾「射」幾個客,小妹這類既沒長腿,又沒美腿,技更不如人,都較難在分行繼續生存了。

文章授權: 90後銀行小妹甩轆記