【網民熱話】返新工壓力大到想喊要求醫 「咁辛苦為咩 全港得一份工？！」
撰文：麗爾｜圖片：電視截圖
另有網民分享自己過來人經驗，試過返工壓力大到落樓下停車場喊，雖然身為大男人喺度喊但唔覺得可恥，因為壓力真係會爆煲，試過嘅人都會明白。冷靜落嚟後send wtsapp同老婆講我頂唔順要辭職亦得到支持。
該名網民表示慶幸自己有咁做，而唔係死頂。認為人一世物一世，唔應該虐待自己。頂唔順就要堅決走。公司，上司，老細唔會可憐你，只有你自己同愛你嘅人先會心痛你。
你走咗，公司即刻就會搵人代替你，一個星期之後冇人會提起你。
亦有過來人表示，曾經自己都面對好惡劣嘅情況仍然猶豫不決。甚至呃自己呃人哋話咁樣係深思熟慮，理性分析。依家諗返真係可笑，
其實就係怕死，畏首畏尾，怕改變怕適應冇自信淆底。經歷過嘅人其實一眼就睇得出當時我嘅心理狀態，仲以為呃倒人。其實真係冇咩咁大不了，成世人流流長，呢件根本就係小事，以後大把路要行，條路會帶住你行，唔需要怕。
如果出面搵唔返呢份人工？
不少網民對事主都深表同情。更有網民提到，自己處境同事主一樣，甚至多一個顧慮，就係年紀都接近４字頭。
有人分析指事主現時嘅恐懼，就係自己想像出嚟嘅下一份工比依家嘅更可怕，驚下一份工可能更差，人工福利比唔上依家，Title低咗……等等之類嘅嘢。越諗越恐懼，覺得唔走好過走，所以一次又一次咁說服自己留低。
人唔應該相信自己嘅想像，反而應該接受過來人嘅建議。外面海闊天空，唔需要咁驚。將來望返轉頭，依家呢個階段同諗法真係得啖笑。
就算快4字頭都唔應該驚，其實並不值一提，唔好自己困住自己。
問自己肯捨棄甚麼
首先要明白，任何事都絕對有可能，要先問自己肯捨棄乜嘢。
網民表示，其實冇咩大不了，最多咪重頭嚟過。留低唔需要勇氣，死忍就得，過完一日又一日；離開先係真正需要勇氣，去面對未知。
情緒會影響健康，身體最重要，找份適合自己。
probation＝雙方適應和磨合
試用期係俾雙方面真真正正了解深入觀察大家夾唔夾得嚟。啱啱返新工未適應環境，要努力俾啲時間去適應下。
如果適合唔到，勉強只是浪費大家時間。並不是一相情願希望可以用三個月去改變自己變成另一個人。
而事主新工咁大壓力，即係份工唔適合，就應該搵過另一份。就算勉強捱落去，呢種情況多數做唔長，早啲走好過。
新公司，新人事，新工作，好多未做過嘅嘢。壓力大是正常，因為對自己有要求。
人工高唔係代表一切
曾經天真以為高人工就為之好，但冇諗過人工稍為高少少代價係好大，受唔起同承受唔到份工既壓力比你幾高人工都冇用。
人工高都要你做得長先有用，快手找定其他工，萬一真頂唔順或者對方唔再忍你，你都可以好快返第二份工。 又或者人工高但會捱壞個身體，有情緒病，多多錢都補唔返，到時有幾多錢都無用。
另外，假如上司唔鍾意你，應該係一開始就睇你唔順眼，好難突然器重返你，覺得你好掂。就算有咁嘅情況都非一年半載嘅事。
