騎呢吸金王逐個捉

社會熱話

廣告

近排香港流行女子(MK)組合FFx以一首《Sugar Baby》係網上hit爆!Sugar Baby MV內,無論主角造型、服裝、化妝、舞步、歌喉以致MV質素,皆可以用一個詞黎形容──騎呢!不過騎呢都有市場,短短兩日,youtube的官方MV已有接近80萬點擊率,好多廣告都望塵莫及。雖然呢個騎呢MV負評唔少,但邊個話騎呢唔可以賺錢架?其實歷年黎來都有唔少人靠騎呢上位架!而家等小編同大家回顧下。

八両金

八両金天生一副獨特的樣貌,應該冇乜人諗到佢食演藝呢行飯。但佢就靠演醜角,加上佢經典既冬菇頭、帶有少少鄉音既廣東話以及頸上的粗金鏈,成功打響名堂,電影一套接一套。小編第一次係電視見到佢個陣先得五、六歲,已經對佢有好深印象,真係算得上嗰個年的騎呢代表!

賺錢能力:電影X29, 電視劇X6

劉以達

劉以達出道時同黃耀明組樂隊「達明一派」,負責編曲、作曲同演奏樂器,係非主流音樂界都有返咁上下影響。由於劉以達形象予人長期夢遊的狀態,咁就畀周星馳發掘左,令佢的騎呢形象提升哂,如食神入面既「夢遺大師」,真係經典中既經典。

賺錢能力:電影X38, 電視劇X3

魯芬BB

魯芬BB既外型走唔到美女路線,所以一出道已經走醜角路線。鲁芬BB好多時都唔介意醜化自己,女扮男装或者做一D大山婆、女惡霸既角色。魯芬BB雖然演技浮誇騎呢,但觀眾都幾受落。最近佢仲同韓星李光洙合作,所以話騎呢都有市場架!

賺錢能力:電影X28, 電視劇X13

夏蕙姨

夏蕙姨呢個年紀,仲經常濃妝抹艷,仲要打扮十分出眾,成日以唔同造型出席公開場合,但就唔係人人敢恭維。例如係萬聖節扮鬼,去蘭桂坊參加萬聖節巡遊,仲話自己係「麗鬼」。每年又以唔同造型去黃大仙廟同市民爭上「頭炷香」!雖然夏蕙姨近年冇乜參與電影拍攝,但就畀海洋公園睇中左,係上年搵佢拍下廣告。

賺錢能力:電影X1, 廣告X1 (騎呢後)

William Hung

William Hung係03年參加《美國偶像》,當時參賽翻唱Ricky Martin的《She Bangs》,走音不特止,仲跳埋D奇奇怪怪既舞步,當時連評判都頂佢唔順要STOP佢。不過雖然佢過唔到關,但憑佢騎呢既形象,係美國同香港都爆紅過一排。當時返黎香港後,都有瘦身飲品搵佢拍廣告,之後仲拍左套戲!

賺錢能力:電影X1, 廣告X1

阿舜

以前《都市閒情》有個環節叫《鬥戲連唱鬥一番》,畀家庭觀眾表演唱歌同埋重演一段劇集片段,再由嘉賓評選勝出者。而呢個節目入面,最爆既參賽者一定係阿舜!當時阿舜一身MK LOOK,五音不全咁唱《娃娃愛天下》,再加上佢自創既「MOON WALK」,真係沒有最騎呢,只有更騎呢。佢紅左之後都冇出過黎,直至今年先出返黎,仲去左荔園表演!

賺錢能力:表演X1

PSY

係2012年7月,PSY出左一首《Gangnam Style》,紅爆全球。當時紅既韓星都係SELL俊男美女,但PSY就例外,佢騎呢既樣再加上MV入面配個靚女跳騎馬舞,形成一個大既反差,竟然令到呢首歌上左美國「Billboard Hot 100」,仲有唔少歐、美名人跟住跳,而Youtube點閱率更加達到24億,係youtube的收入就過千萬美金,應該是最勁的騎呢吸金王!

賺錢能力:《Gangnam Style》Youtube單曲收入1200萬美金

達哥

達哥最初係網上拍片直播自己打機既情況,之後讀埋潮文同唱歌,佢獨特既樣再加講野方式,令到愈黎愈多人留意佢,依家唔少廣告商都搵達哥做宣傳,除左有遊戲商外,仲有旅遊及藥品廣告,仲有不同FUNCTION出,賺錢能力高過好多俊男美女。

賺錢能力:網台X1, 廣告X N個

天堂鳥

ffx一出,好多人即時諗起天堂鳥,呢隊三人男子組合,上年憑一首《登陸太陽》HIT爆,當中既歌詞同佢地化妝引起網民廣泛討論!首先係歌名,同之前北韓一則派人「登陸太陽」既新聞一樣。跟住佢地既造型又比人灌以「MK-POP」,成功成為MK文化代表。

賺錢能力:《登陸太陽》Youtube單曲收入7.6萬

睇完以上個案,大家都咪話ffx未必就咁淹沒係負評當中,可能隨時跑出,有廣告接都唔奇架。