騎呢工作坊 商機一籮籮

社會熱話

廣告

想扮文青,其實好簡單,親手造皮革、瓶中花園、燒玻璃等等,輕輕鬆鬆過悠閒的一天。

市面上有不少工作坊,真係花多又眼亂。當中有好多都好「騎呢」吓,價錢仲唔係平,但都仲有好多人參加。估唔到騎呢都可以有商機。

自製布M巾(全男班) (約$190)

情人節諗唔到送咩俾女朋友好?嫌無新意?又想女朋友啱用?早排開咗個M巾製作班,仲講明只限男人參加,話送俾女神可以表達到對佢的愛與關懷喎。女神感唔感受到就唔知啦,不過如果係港女,就要睇下你係咩Package啦!

自製月亮 (約$480)

同女神一齊賞月簡直無夢寐以求,又要女神肯,又要佢得閒,仲要咁啱係月圓之時,真係要夾好天時地利人和。

為增加成地率,依家可以自製月亮,想幾時賞月都得啦!其實呢個工作坊係造一個月球燈,外表都幾次月亮,幾浪漫。不過整呢個月亮燈唔簡單,失敗率都幾高。480蚊一次,抵唔抵真係見人見智,小編都係決定農曆十五望吓個月光算啦!

過萬元整戒指 (約$12,800)

手作坊應該係平平地又可以消磨時間,但估唔到竟然可以過萬元。材料包括12克24k金或18k黃/玫瑰/白金,親手整的心思係買唔到,呢樣野當然明啦,但過萬應該可以買到粒幾大下的鑽石戒指。大家估吓,女神BB會見到你手造的K金戒指開心啲?定係見到粒鑽戒開心啲呢?

自製杯麵 (約$20)

「我的合味道工作坊」係香港都舉辦過,仲吸引到好多人排隊逼爆商場。呢個工作坊係20元一次,換來的係大家可以任揀配料。其實去超市買,最少平一半,又唔洗排餐懵!

泥塑人像雕塑班 (約$900-1200)

雕塑通常係藝術家嘔心瀝血製成的文藝作品,要搵個地方好好安放,間唔中拎嚟欣賞。香港地方細,屋企如果放滿雜物,擺個人像雕塑係度好似有失格調。仲有,唔係個個都有藝術細胞,如果整咗個扁口扁面「四不像」,都唔知點擺係屋企好。

脂肪肥皂(慎入) (正常肥皂班約$500)

自製肥皂都好平常,而主要成分係硬脂酸鈉,自製肥皂成分天然,敏感皮膚都用得。

但最近內地有位女士整咗個重口味版,話前男友因為以貌取人飛咗佢,所以就去醫院抽脂,用自己脂肪整成肥皂送俾佢前度全家用。嘩真係諗起都覺得核突,真係千其千其唔好得罪女人!如果你收到都要諗下最近有冇得罪人。

鐵線花插 (約$280)

用鐵線造的座檯花插,其實個製成品都相當騎呢,唔知實唔實用,係唔係真係插到花架?其實280元,可以自己買一堆鐵線返嚟慢慢屈,除平好多之外,又唔洗限時間,仲可以做好多送俾朋友。

手製書本 (約$280)

課程賣點就係有本獨一無二的書,由封面到內頁都係自己一手一腳整成。聽落好似好浪漫咁。之但係諗深一層,呢舊野會唔會遲啲都變咗家居廢物呢?呢個時代都冇乜人會寫字,咁本書就變咗無字天書,而且都唔知寫乜好。真係要寫,買本記事簿應該仲實用!