點解雙拼要加錢? 經濟學原來有解釋

社會熱話

廣告

話說小編今日放lunch去食麵,想平平地叫碗雲吞麵,但望到對面的水餃好大件、好足料、好想食,但一個人想食兩樣餸,唯有叫「雙拼」啦。

碗麵嚟到,雲吞2粒,水餃2粒,心諗正啦,但原來單拼又係得4粒。一碗單拼麵要27蚊,雙拼何解要30蚊? 明明份量無變,如果兩個人食,各叫一碗單拼麵再交換,都可以做到雙拼效果,點解一個人叫「雙拼」要貴D先? 公平咩???!!

雙拼份量無多到,不同的是選擇多左,為滿足自己同時食到兩種食物的時候,你只好揀「雙拼」,就係呢一點,就比老闆看穿了你,要你畀多D錢先得。

邊際效用遞減定律

呢個情況可用經濟學的「邊際效用遞減定律」(Law of Diminishing Marginal Utility)來解釋。

當每樣事物的數量上升時,邊際價值則會有所遞減。譬如說,你食第一粒雲吞會有10個開心,即是最開心,食第二粒可能會得番8個開心,第三粒就有6個開心,如此類推,直到食到開心係零為止,即是不再感到開心。

而「雙拼」就係將兩種食物放埋一齊,食第一粒雲吞會有10個開心,食第二粒水餃就有9.5個開心,比食「單拼」的第二粒雲吞而得的8個開心高。

所以,一碗麵應該以一個購買計劃來看,每粒雲吞和水餃都應拆開來計算,「雙拼」的數量雖然沒變,但「雙拼」的總價值(Total use value)提高了。你想吃兩種食物的期望大於吃一種食物,因此,你願意付出「更多」去買到更多開心。

不過世事邊有咁簡單,實際啲好,加錢喎,唔係個個願意加錢要多樣餸,正如凍飲加3蚊你都要諗諗啦。

加錢對顧客來說等於增加成本,當成本太高,需求便會下降,有多麼正的貨品都唔會賣得出。所以加幅必需符合需求,否則只會嚇走顧客。一旦超出合理需求或顧客心理關口,加價後都只得好少人揀「雙拼」。「雙拼」尤如老闆和顧客之間的博奕,加幾多錢就是不斷試水溫,從無一個確實指標。

雙拼賣的不是成本 而是享受

換個角度看,對於老闆來說,「雙拼」的成本其實沒有改變,一碗雲吞河27蚊,一碗水餃麵都係27蚊,每碗同樣有4粒雲吞或水餃,「雙拼」同樣又是4粒,唔會因「雙拼」而要付出多了。所以,「雙拼」賣的不是成本,而是享受。(假設每粒雲吞和水餃的成本相同)

咁你又會話我約朋友一齊去食,叫單拼再Share黎食,價錢又平啲,又可以滿足食兩樣餸的享受。不過,你首先要搵到兩個人一齊去,而且你朋友要肯同你Share先得。

食碗麵之嘛,竟然可以講到咁多野。食飽了,係時候叫野飲,「熱鴛鴦呀,唔該」……咪住! 點解飲鴛鴦又唔洗加錢呢?公平咩?!!!!