診所職場事 寶豬趣聞 應人 珍寶豬 經一專欄

診所職場事 【寶豬趣聞】應人|珍寶豬|經一專欄

職場

廣告

診所職場事・ 經一專欄】有日我去完洗手間返到診所…

見到一位阿姨個樣好唔歡喜咁望住我~
我已經急急腳行返入去登記處,就喺就快成功入去之際,阿姨一手捉住我半碌手臂,我見痛痛哋就『哇~』咗聲出嚟。
佢縮手後問我:「你去咗邊呀?」

撰文:珍寶豬|圖片:電視截圖

我:「我去咗洗手間呀」
佢:「我頭先喺度嗌咗好耐都冇人應,你做咩唔應我?」
我喺冇雷公咁遠嘅廁所屙緊屎又點應你呀?就算你要怪冇人應你,你都應該怪房入面嗰個醫生啦下嘛?
我:「你頭先見到我喺出面返入嚟㗎可?我喺出面應唔到你嘛」
佢:「好醜都應我一聲呀,我成個傻婆咁喺度嗌人咁」
你而家都成個傻婆咁呀。

我:「唔好意思呀,你要睇醫生係咪?我俾返去再同你登記呀~」
佢:「你頭先出去咁耐做咩嚟呀?」

我:「去廁所囉」
佢:「屙鎖鏈呀?」
係呀,屙晒成抽出嚟準備攞嚟SM你㗎啦。
我:「你要睇醫生嘅我可以同你登記~」
佢:「返工時間可以離開工作位置咁耐㗎咩?」
我:「阿姨呀,我都有權去洗手間嘅,診所呢度冇洗手間我就要出去㗎啦,我哋呢啲話題不如就算啦好冇呀?你都係嚟睇醫生啫?我同你登記啦」
佢:「你知自己錯就得啦,我都俾晒機會你㗎啦,如果我係啲陰濕小人我就入房先投訴你㗎啦,我而家真係俾足機會你,下次有人嚟點都好要應人呀」

醫生,我可以拉線駁個傳聲筒去洗手間度呀?方便我一邊屙屎一邊應付你啲好病人?係我唔啱,我唔曉千里傳音~音~音~~