診所職場事 寶豬趣聞 我的媽媽是 珍寶豬 經一專欄

診所職場事 【寶豬趣聞】我的媽媽是 | 珍寶豬 | 經一專欄

職場

廣告

診所職場事・ 經一專欄】有日兩個家庭嚟到診所~登記後,大家都坐低等睇醫生。

小朋友們坐埋一齊玩,大人就喺度傾計~
A家長:「唉,今次又唔知要睇幾多錢先可以搞得掂啦,次次一個病就全家病」

撰文:珍寶豬|圖片:電視截圖

食菜救地球

B家長:「你哋成家抵抗力都咁差㗎咩?係咪平時飲食習慣唔好呀?」
A家長:「可能因為我哋成日出街食卦,放工都攰啦,仲邊想煮飯㗎~」
B家長:「簡簡單單煮囉,食得街外嘢多身體都差啲㗎」
A家長:「就係連簡簡單單嘅力都冇嘛」
B家長開始一輪訓話:「你唔顧自己都顧吓個細啦,你病你死你事,個細嘅無辜㗎嘛,你生得佢出就要俾最好嘅佢㗎啦,日日食街外嘢身體點好呀?好似我咁,我幾辛苦都會煮飯㗎,平時仲一齊食好多菜,救救地球呀嘛,食多啲菜身體好啲,環境好啲,難聽啲講句,放個屁都香㗎!」

B小朋友望望自己媽媽:「媽媽,你放屁係臭㗎」
B家長好很尷尬,用手輕輕拍拍小朋友:「哈哈,收聲啦」

我媽媽係⋯⋯

A小朋友問B小朋友:「你媽媽放屁真係好臭㗎?」
B小朋友天真的大力點頭。
B家長望住A家長:「呵呵呵,細路講嘅嘢真係唔好信呀,咁細個邊識分咩係臭同香呀」
B小朋友又望望自己媽媽:「媽媽我識分㗎,花係香,公廁係臭」
A小朋友問B小朋友:「咁你媽媽係咩呀?」
B小朋友:「我媽媽係公廁」
A小朋友:「啊,姨姨係公廁」
…唔知俾自己小朋友話係公廁,個心理陰影面積有幾大呢?
B媽媽激氣到唔再出聲,塊面谷到好紅…