診所職場事 寶豬趣聞 收工 珍寶豬 經一專欄

診所職場事 【寶豬趣聞】收工(上) | 珍寶豬 | 經一專欄

職場

廣告

診所職場事・ 經一專欄】有晚截症後,醫生睇緊最後一個症…點知位病人口水多過茶~

由上幾個月講到今時今日嘅病徵,講講吓中途又返轉頭再重新講過…
我望住個鐘,每過一分鐘就有六十秒OT,每六十秒OT係頂佢個肺冇OT錢。

撰文:珍寶豬|圖片:電視截圖

等呀等呀等,終於我聽到位小姐開房門了!臨出門口仲同醫生講『真係唔該晒你啦醫生,有咩唔明我可唔可以再問你呀?』
醫生要做好好醫生,梗係話好㗎。
醫生極速出藥單,我哋再極速執藥俾醫生check。
我同小姐講:「小姐,可以攞藥啦」

我望住佢悠閒地篤住電話扭住屎忽咁行埋嚟…
佢行到埋嚟同我講:「等等呀,等我覆埋個message先呀」
我:「唔好意思呀小姐,我哋要收工,醫生要走㗎啦,你攞完藥之後先再覆呀好冇呀?」
佢望望我,再望望鐘:「哦?乜收工啦?收幾點㗎你哋?」
我:「八點呀」
佢再望望鐘:「而家先八點四啫,你等等呀,我覆緊㗎啦」

我聽到醫生房入面有人掉筆…
我:「小姐,你攞完藥之後再慢慢覆啦,呢度啲藥每日食四次…」
我都未講完,佢:「係咪等一陣都唔得呀?我覆緊啲好緊要嘅嘢呀嘛!」
佢講完之後行咗去坐低…
醫生,不如我哋鎖門走啦?留低佢自己喺度覆天光啦~
我:「阿小姐,我哋真係收工啦喎?」

佢望住電話講:「你咪收囉你走囉」
我入房同醫生講:「出面位小姐唔肯拎藥喎,佢嗌我哋走喎收工喎~」
醫生望望鐘:「咁走啦」
Oh!yeah~拎手袋走人啦喂~
下回續。