診所職場事 辭職 轉工 打工 同事 公司 網民熱話

診所職場事 【寶豬趣聞】收工(下) | 珍寶豬 | 經一專欄

職場

廣告

診所職場事・ 經一專欄】上回講到小姐唔願拎藥,掛住篤電話阻住我哋收工~

因為醫生要睇住我哋鎖門嘅關係,我哋就同醫生一齊行出門口。
正當要出去之際,小姐抬一抬頭望到醫生都出埋嚟,佢就問:「醫生走啦?」
醫生點頭:「係呀」

撰文:珍寶豬|圖片:電視截圖

小姐繼續坐喺度,我哋就出咗去,鎖門,準備拉閘。
輕輕一拉半道閘,小姐望望門外嘅我哋,佢立即跑埋嚟嘗試拉門,當然~門鎖咗梗係拉唔開啦。我爭啲想歡樂地同佢揮手say goodbye。
佢隔住隻玻璃門,又拍又嗌:「你哋做咩呀?」
收工囉走囉,你嗌嘅?

我:「小姐,我哋收工啦嘛」
佢天真地問:「咁我呢?我喺度做咩呀?我未攞藥㗎喎?你哋走晒我點呀?」
我:「又係你頭先叫我哋走嘅,我講咗我哋收工㗎啦」
佢:「我嗌你哋走就真係走㗎啦咩?我都未拎藥未俾錢」
車,嗰幾百蚊又唔係直入我袋,你估我好志在咩~

佢望住醫生講:「醫生醫生,我喺度呀」
醫生立即屬牛屬馬擰轉臉。
佢拍玻璃門:「開門呀,我拎藥啦我拎藥啦,你哋唔好落閘呀」
醫生好人嚟㗎嘛,醫生開聲:「入去搞掂佢啦」
我:「哦」

於是小姐一副委屈樣咁攞藥俾錢。
小姐出門口後見到醫生一直企喺門口等我哋,佢同醫生講:「多謝醫生你肯等埋我呀,如果冇你,我一定俾姑娘困住喺度,多謝你呀醫生。」
醫生點點頭,繼續屬牛屬馬擰轉臉:「嗯」
小姐當正醫生係救命恩人咁款,我同小姐講:「小姐,唔該你行開啲呀,我要落閘啦」
小姐繼續一副崇拜樣望住醫生,醫生一見我落好閘鎖埋門就飛快地離開現場。

小姐舉起左手向飛快嘅醫生大嗌:「醫生,一齊行呀?」
小姐望望我:「點解醫生走得咁快嘅」
我:「你阻住佢收工,佢唔鍾意你呀!」
小姐:「吓?你妒忌我靚過你同醫生有機會先咁講呀?」
哦。一定係啦,我都飛快地走了。