診所職場事 裁員 打工仔 公司 員工 貿易戰 網民熱話

診所職場事 【寶豬趣聞】冇證件的小姐|珍寶豬|經一專欄

職場

廣告

診所職場事・ 經一專欄】有日一位小姐嚟到診所。

佢行埋嚟登記處成碌木咁企喺度唔出聲。
我望住佢講:「小姐,請問係咪睇醫生?」
佢:「你知我想點仲問呀?你好得閒咩?」
自從你嚟咗我就唔得閒啦!

撰文:珍寶豬|圖片:電視截圖、unsplash

我:「睇醫生嘅麻煩你俾身分證明文件我呀」
佢:「我唔駛你樣樣提嘅」
…咁自動波啦炳你!
我坐喺度喺度等佢俾身分證我,一等再等。
我:「小姐,你唔係俾身分證我咩?」
佢:「我都冇帶,我幾時有話俾你啫」
哇,你係咪更年期專登嚟撩交嗌㗎?

我:「咁你有冇喺度睇過醫生呀?」
佢:「你認唔認得我呀?」
我:「唔認得」
佢:「咁咪即係冇喺度睇過囉聰明」
我想掉佢粉腸嚒囉酥呀!

我:「小姐,就算好多人嚟睇過我哋都未必認得晒,一日閒閒哋都有八十幾個症,我哋邊認到咁多呢?你未睇過嘅就一定要有身分證登記,如果你冇帶嘅你就去拎返身分證先再過嚟啦」
佢:「身分證唔見咗喎」
我:「如果你需要病假紙同收據嘅,就一定要身分證。你要唔要病假紙同收據呀?」
佢:「我梗係要啦聰明!唔係我嚟睇醫生做咩呀?真係嚟俾佢醫咩?咪又係開幾粒丸仔俾人,咁就係醫生醫緊人啦喎!」
你咁唔歡喜嘅,何不自己寫病假紙呢?
我:「咁你一定要有張可以證明到你身份嘅嘢啦,你唔見身分證就去報失先啦,你搞掂之後再嚟睇醫生啦」

佢:「幾點呀家陣?我搞得嚟你哋唔係收工啦咩?」
我:「而家先四點幾啫,你有冇其他身分證明文件呀?回鄉卡呀護照呀嗰啲呢?」
佢:「我唔見得身分證梗係咩都冇㗎啦聰明!我錢都冇啦!」
我:「我哋睇醫生係會收費」
佢:「我咩都唔見晒你仲收我錢呀?」

我:「首先你而家冇任何身分證明文件,就算我哋醫生肯唔收你錢都俾唔到病假紙你,所以你第一樣嘢要做嘅就係搞返你啲證件先~」
佢:「咁我冇身分證睇醫生嘅會俾啲咩我呀?」
我:「藥囉,淨係可以俾到藥你」
佢手指指邊行邊講邊離開診所:「俾幾粒丸仔我就當識醫人啦喎,痴線!啲咩醫生嚟,假紙都唔識開!」
唔係醫生唔識寫病假紙,係唔寫俾你啫。