診所職場事 裁員 打工仔 公司 員工 貿易戰 網民熱話

診所職場事 【寶豬趣聞】洗胃 | 珍寶豬 | 經一專欄

職場

廣告

診所職場事・ 經一專欄】有日一位小姐嚟到診所。

佢個樣好似好辛苦咁慢慢行埋嚟登記處…
佢挨住登記處:「姑~~娘~~」
我:「…係。你要唔要行去坐低先呀?我出嚟同你登記呀」
佢:「我個胃~~好~~痛呀」

撰文:珍寶豬|圖片:電視截圖、unsplash

我:「好好好,你要唔要我扶你過去坐低先呀?」
佢:「唔駛啦,唔好行嚟行去啦,我唔想再行啦,醫生可唔可以出嚟醫咗我先呀」
我:「醫生而家睇緊症呀,你喺度睇過未呀?你食錯嘢呀痛成咁嘅?」
佢:「未睇過呀,我唔飲得咖啡㗎,一飲就~~好~~痛~~」

我:「咁你而家痛係…」
佢:「我頭先飲咗咖啡」
你是M系的嗎?
我:「你俾身分證我呀,我同你登記啦,下次唔好飲啦,明知唔飲得嘅就唔好飲啦嘛」
佢:「係咪一陣有得幫我拎返杯咖啡出嚟呀?」
點拎呀?你係連杯啪咗入去嗎?我就咁伸手入去拎嗎?你擘大個口啦,小姐,我入啦!

我:「…我哋冇得拎返杯咖啡出嚟㗎喎,點拎呀?你去邊間診所試過呀?」
佢:「冇呀,我未試過呀,唔即刻拎嘅我咪繼續痛囉?」
我:「睇咗醫生先啦~」
佢:「食藥都要俾個胃磨…」
坐喺度嘅姨姨搭嗲:「咪反佢出嚟洗囉,我見平時啲人都係咁咋嘛,唔反得咪啤水囉」
為咗杯咖啡而咁,值得嗎?

佢問姨姨:「邊度有呀?」
姨姨答:「行去街市嗰邊咪有囉,你過去睇吓囉,我唔記得邊間啦」
佢同我講:「姑娘,咁我走啦,你呢度冇得洗我去街市嗰度搵醫生啦」
我問姨姨:「阿姨,你講嗰間診所嚟㗎?」
姨姨:「唔係呀,豬檔呀,我朝早行過見到佢喺度洗㗎」
小姐安靜地放低張身分證俾我登記。