診所職場事 【寶豬趣聞】愛護動物｜珍寶豬｜經一專欄

一位小姐入到嚟診所，佢行埋嚟登記處問：「等幾多個呀？」
我：「而家登記嘅排第六個」
佢：「咁同我登記啦」

撰文：珍寶豬｜圖片：unsplash

登記後，佢行去座位度，不過佢第一件事唔係坐低～
佢將手上嘅寵物袋放上座位，拉開拉鏈，伸手入袋抱咗隻狗仔出嚟。
之後佢抱住隻狗仔喺診所周圍行，一邊行一邊講：「你睇吓，你聞吓呀」
我同佢講：「麻煩小姐你放返隻狗仔入袋先呀」
佢唔理我。

當中有位病人行埋嚟細細聲同我講：「姑娘，我可唔可以轉頭先返嚟再睇呀？佢走咗之後你話我知呀，我再返嚟呀？」
小姐咁啱就行到去呢位病人後面，佢同病人講：「你驚狗呀？駛唔駛咁驚呀？我boyboy咁可愛都驚？」
我：「小姐呀，其實呢度診所嚟㗎，你可唔可以放返你隻狗仔入袋呀？」

佢高八度音：「梗係唔得啦，我boyboy唔可以喺袋入面太耐㗎，佢驚黑㗎」
我：「個袋上面有塊布俾你打開㗎嘛，打開咗咪有光囉，你咁樣抱住隻狗周圍行都會影響到人㗎，麻煩你放返隻狗入袋」
佢抱住佢隻狗係咁錫：「唔得㗎，boyboy好痴我㗎，見少陣都喊㗎，boyboy可？」

我：「你咁樣影響到人啊～」
佢：「影咩響啫」
企喺我面前嘅病人終於頂唔順。『乞～～～～痴～～～』
病人邊走邊講：「我轉頭返轉頭返」

佢即刻好大反應：「你做咩對我boyboy打乞痴呀？你有病㗎？」
我：「小姐，如果你再唔放返隻狗仔入袋嘅話，咁麻煩你出去等啦」
佢：「出面咁凍你忍心要我兩母子出去呀？」
你扮咩可憐啫。

我：「始終呢度係診所，你帶狗入嚟都算啦，你放返佢入寵物袋就算啦好冇？」
佢：「你當佢係毛公仔唔得㗎咩？」
我當你係死屍我唔得呀？

我：「唔好自己呃自己啦。你唔放嘅就麻煩你出去啦」
佢：「咁我唔睇啦！我都唔想幫襯啲唔愛護動物嘅診所囉，我好愛護動物㗎！我最憎就係你呢啲唔鍾意動物嘅人呀！」
佢行去放返隻狗入袋，扭住屁股咁離開診所。
有時呢～唔係人哋唔鍾意動物，係唔鍾意你啫。你唔好仆住出嚟做愛護動物嘅代表添呀。