診所職場事 【寶豬趣聞】小姐心事（上回）｜珍寶豬｜經一專欄

我：「你好乜乜…
我都未講完，一把響亮嘅聲音已經急不及待嗌出嚟：「預約呀！」

撰文：珍寶豬｜圖片：電視截圖

我：「小姐唔好意思，我哋診所係唔需要預約嘅，嚟到登記排隊就可以啦」
佢：「我唔排隊呀！同我預約！」
我：「我而家同你登記咗嘅話，嚟到都係要等㗎咋」
佢：「你而家同我預約呀！」

我：「我而家同你登記定呀，咁你嚟到講返我知你個名，到時就照排隊等呀」
佢：「我要俾咩資料你呀，快啦，我唔係好得閒㗎咋」
我：「請問小姐之前有冇喺度睇過？如果有嘅就麻煩你提供返覆診卡號碼呀～」
佢：「冇覆診卡呀！身分證呀！XXXXXXX」

我：「係～乜小姐係咪？咁我已經拎定你排版出嚟㗎啦，你嚟到診所嗰陣記得去登記處通知返我你已經到咗，咁到時再排隊呀」
嘟。我被CUT線了。真有禮貌啊～

隔咗三個鐘左右，有位小姐一入門口已經大嗌：「乜小姐嚟咗啦！」
我望望佢，問佢：「你使唔使探熱呀？」
佢：「唔使呀」
我：「好～我而家同你排隊呀，排第七個，你坐低等等呀」

到醫生房入面位病人出嚟後，阿小姐佢企起身行去醫生房門不停推門，當然醫生門係鎖咗啦。
佢就大聲喝我：「喂！開門呀！」
我：「小姐，都未到你，你排第七喎，前面啲人都未睇～你坐返低先啦」
佢：「我頭先預約咗㗎！」

我：「你頭先喺電話我咪同你講咗喺電話登記完都係要過到嚟排隊等囉？我哋冇預約㗎嘛！」
佢：「頭先嗰個唔係咁講㗎！」

下回續。