診所職場事 【寶豬趣聞】小姐心事（下回）｜珍寶豬｜經一專欄

撰文：珍寶豬（funnyclinic）｜圖片：電視截圖、unsplash

細診所成日要一腳踢

唔知佢係咪唔認得我把聲？我把聲咁YAP都唔認得？
我：「頭先同你講電話嗰個咪係我囉～」
佢：「你頭先邊有同我講過電話呀？頭先嗰個話同我預約咗㗎！」

我：「係我嚟嘅，今日診所係得我一個聽電話，總之我頭先喺電話講係同你登記，我係講得好清楚嚟到係要排隊。」

小姐係咁推門想打尖？

佢係咁推門：「我冇咁多時間同你玩呀！開門呀！我要入去呀！」
我：「麻煩小姐你坐返低呀，就算你入到去醫生都唔會睇你㗎，都係會叫你出返嚟～你個排版都未拎入醫生房」

佢繼續推門：「俾我入去呀！」
其餘幾位病人開始一人一句『坐低啦，唔好打尖呀』，『得你想睇先咩』，『趕住去拎出世紙呀』

初初小姐都有駁吓咀『關你咩事呀』。

叔叔一句話 小姐即刻離開診所

到叔叔講咗句…：『你係咪屙爆咗粒痔瘡呀？嗰時我又係咁，真係要急住睇醫生㗎！真係好攞命㗎！我俾你睇先啦，女仔之家，你哋都俾佢睇先啦？姑娘你就做吓好心啦，大家都係女人，大家都有屎眼。痛起上嚟真係好痛㗎，如果唔係佢駛咩咁急睇呀。我認得呢位小姐㗎，佢住我嗰棟樓㗎！我成日都見到佢，一早都覺佢係有事啦』。

叔叔唔知係咪講中咗小姐某啲傷心事，小姐靜了，佢安靜地離開診所…
喂，做咩走呀，屙爆咗嘅話就睇醫生啦。