診所職場事 【寶豬趣聞】新鮮避孕套｜珍寶豬｜經一專欄

撰文：珍寶豬（funnyclinic）｜圖片：電視截圖、unsplash

姨姨嚟診所驗咩嘢？

佢行到埋嚟就問：「姑娘，可唔可以同我拎呢啲嘢去驗呀？」
我：「請問係咩嚟呀？」
佢：「我個仔啲嘢嚟㗎」
我：「你個仔？你個仔要驗啲咩呀？佢要驗身嘅話要自己親自嚟㗎喎」
佢：「唔駛唔駛，唔駛佢嚟呀，我拎咗佢嚟㗎啦」
你想講你嗰包嘢…係你個仔嚟呀？
我：「…咁係邊個想驗身呀？」

竟然係避孕套⋯

佢對手開始郁動企圖打開包嘢，我嗌住佢：「阿姨，唔駛開㗎，驗嘢唔駛而家開㗎，你同我講咗想做啲咩先呀」
佢無視我，繼續做佢想做嘅事，一層又一層嘅膠袋，之後又一層又一層嘅保鮮紙，最後係一個小膠盒。佢要揭開了！
佢伸手入去拎出幾個避孕套…套入面仲有啲黃黃的…佢企圖隊嗰抽套俾我～
我向後退：「阿姨，你放返低先，有咩慢慢講」
佢：「我想驗呢啲呀」
我：「你驗呢啲嚟做咩呀？唔係你個仔㗎咩？你攞嚟做咩呀？」

姨姨點解未有孫抱

佢：「我個仔娶咗個老婆好多年，我到而家孫都未有一個，可唔可以驗吓係咪我個仔唔掂呀？我見佢老婆個屎忽好大腰又粗，應該好生得㗎！」
其實唔駛驗都知點解冇機會大肚啦，用晒避孕套又點大肚呀？

我：「…阿姨呀，我哋咁樣驗唔到㗎，而且你都唔可以拎你個仔啲嘢嚟驗，佢要驗嘅就自己過嚟」
佢：「點解驗唔到呀？」
我：「因為入面啲嘢呢…已經死晒㗎啦～」
佢：「吓？我新鮮攞嚟㗎喎」

護士唔識答嘅問題

鮮？有幾鮮呀？
佢繼續講：「我已經喺佢哋掉出嚟嗰時即刻攞起㗎啦！我有雪住佢㗎！」
我：「驗精子唔係咁驗㗎，而且個避孕套係有殺精嘅。你個仔真係想驗嘅，你叫佢過嚟啦，我哋會轉介佢去化驗所～」
佢：「咁你可唔可以幫我睇吓我有冇機會抱孫呀？」
我個樣似睇相神仙嗎？
我：「唔好意思阿姨，呢啲唔係我能力做到嘅嘢…」
阿姨將盒仔蓋好，失落地離開診所。