診所職場事 【寶豬趣聞】意見｜珍寶豬｜經一專欄

撰文：珍寶豬（funnyclinic）｜圖片：電視截圖、unsplash

叔叔特登嚟診所畀意見？

如果我直接叫你走，你樂唔樂意扯呀？
我：「你可以寫封信，我幫你轉交俾醫生呀」
佢：「唔係呀我淨係想講俾你聽咋，你唔好誤會呀」
…我又唔係話事人，講俾我聽有咩用呀？
我：「請問係咩事呢？」
佢：「你樂意聽呀可？唔好介意呀你」
有屁快放啦～

想護士幫手「加藥」

我：「嗯，請講」
佢：「啲藥據我所知係你哋執㗎嘛？」
我：「係呀，之後再俾醫生CHECK～CHECK完就會俾你」
佢：「你會唔會可以喺醫生CHECK完之後加多些少藥落去呢？」

我：「加藥？加咩藥呀？」
佢：「醫生佢開三日藥多㗎嘛，你可以加到去六日藥咁囉，或者十六日都得㗎！」
我：「如果係要多幾日藥可以同醫生講，醫生會開俾你㗎啦，逐日收費咁加上去咋嘛，你直接同醫生講得㗎啦」
佢：「你直接加俾我哋咪得囉，即係姑娘你明唔明呀？睇醫生好貴吓，啲藥咁細粒應該都唔值幾多錢㗎嘛？」

意見接受 態度照舊？

佢拎出一袋藥，再同我講：「我今次嚟都係想要多幾日，你俾到幾多日我都得㗎，多幾日囉」
我：「你咁樣係配藥啊～」
佢：「係呀係呀配藥呀」
我：「你要配幾多日呀？一日五十蚊」

佢：「我唔係好多隻藥，啲藥又唔係好大粒，全部都細細粒㗎喎，你跌都跌咗啦」
我：「我哋好少會跌藥…配藥一日五十蚊呀」
佢：「你頭先唔係肯聽我嘅意見㗎咩？你唔係OK咗㗎咩？」
我：「…意見接受，態度照舊？」
佢拎返袋藥黯然咁離開診所。