診所 減肥 醫生 護士 檢查 珍寶豬 診所職場事 寶豬趣聞 經一專欄

診所職場事 【寶豬趣聞】減肥|珍寶豬|經一專欄

職場

廣告

診所職場事. 經一專欄】有日一位小姐嚟到診所,佢邊揮手邊笑邊行埋嚟,好親切咁問:「今日返工辛唔辛苦呀?」

撰文:珍寶豬funnyclinic)|圖片:電視截圖、Unsplash

小姐嚟診所介紹嘢俾我?

我:「ok啦有心,係咪登記睇醫生呀?」
佢:「姑娘你得閒呀可?」
我:「請問咩事呢?」
佢:「我有啲嘢想介紹俾你呀」
我:「你放低卡片同資料呀,醫生睇完覺得有需要再call你呀」
佢:「你誤會啦,我唔係嚟搵醫生呀,我係專登嚟搵你呀」
我:「…搵我有咩事呀?」
佢懶熟:「頭先咪同你講咗話有嘢介紹俾你,你咁快唔記得啦,你係咪唔記得我呀?」

小姐:我唔係壞人嚟㗎

我:「唔記得..唔好意思呀小姐,其實我而家返緊工嘅,啲私人嘢我唔方便喺返工時候聽呀」
佢:「其實都唔算私人嘅,返工都要抖吓㗎嘛,你咪當抖吓囉」
好呀,我俾人炒咗你養我呀,我好大食㗎,你養得起我先好講。

我:「醫生喺度㗎,我真係唔方便,如果你係識我嘅話,有咩事你自己whatsapp我啦好冇?」
佢:「你唔好誤會啦,我唔係壞人嚟㗎」
點睇都唔似好人呀又。
我同事見我耍唔到佢走,於是佢都行埋出嚟同小姐講:「小姐,你唔係睇醫生嘅麻煩你離開呀,你咁樣騷擾到我哋」

同事一出聲 小姐離開診所

小姐:「哎呀,你哋唔好咁啦,我都係為佢(指我)好㗎咋,其實我以前都好似佢咁肥㗎,我知道冇一個女仔係想肥㗎,你望吓我而家係咪好FIT先?我都想佢(又指我)好似我咁FIT㗎!我個減肥方法好簡單㗎咋,食啲嘢就可以瘦到我咁㗎啦」
啊,你真好心啊。頂你個肺呀!
同事望望我,再望望小姐,同小姐講:「係呀?咁易呀?」
小姐:「係呀,真係好易㗎咋」

同事:「咁你拎去俾明星呀上網嗰啲KOL呀,佢哋要出鏡更加有需要啦!佢(指我)剩返屈喺度突個頭出嚟邊個會睇到佢身形呀?你啲減肥嘢有冇註冊㗎?你知唔知自己賣嘅係咩成份㗎?」
小姐戰敗離開診所
同事同我講:「你呀,淨係突個頭出嚟都俾人知你肥嘅?縮埋啲個頭啦!」
同事,你唔好講到我好似隻龜咁啦好冇?我有些少難為情呀…