沒有TSA的日子 90後小學生真幸福

社會熱話

廣告

呢幾日,全港都講TSA。TSA直頭係萬惡之源,小朋友要早返學晨操TSA之餘,返到屋企仲要操TSA Past Ppaer,搞到班小學雞冇晒童年,可恥!到底現今小學生時間表係點,小編以自己的小三生活同佢哋做咗個對比。

返學時間

九十年代小學大多都係分上下午班,上午班就返8點放12,下午班就返1點放5點,一日都係返4個鍾,非常爽皮。

依家嘅學校轉晒做全日制,正常返學時間朝8晚4,每日返成8個鍾,同返工差唔多。

放學之後(1990s)

以九十年代上午班學生的小編為例

0800-1200:
上學去

1200-1300:
放咗學就即刻返屋企食個靚飯。

1300-1400:
食飽最好就係瞓,朝朝6點起身返學好眼瞓㗎。

1400-1500:
身為好學生的小編,係會自動自覺做完功課、溫埋習先去玩。想當年,平日做多過三樣功課已經覺得好多,難怪今時今日被叫廢青。

1500-1630:
做完功課梗係去玩喇!叫埋隔籬屋的小伙伴一齊玩「1、2、3紅綠燈」、「麻鷹捉雞仔」,諗起都開心。

1630-1800:
4點幾鐘就會即刻衝返屋企,唔係因為阿媽就返,而係電視開始做卡通片。小編相當慶幸,唔係睇喜羊羊大。當年睇嘅係數碼暴龍、寵物小精靈、超人迪加,依家講返真係套套經典。

1800~2000:
6點做新聞就唔關小朋友事,當年小編會放空個腦等食晚飯或者叫爸爸媽媽玩遊戲。

2000-2200:
夜晚就繼續睇電視,當年大台電視劇對小編而言真係世界級好睇,所以通常都睇到唔願瞓。

放學之後(現代)

以現今小三學生為例

0745-1545:
朝早6點鐘爬起身返學已經好慘,仲要提早返學晨操TSA。對住堆「佢識你,你唔識佢」嘅試卷,真係慘絕人寰。操完45分鐘卷之後就即刻要上堂,真係抖啖氣都冇時間。

1600-1900:
一班為子女勞心勞力嘅家長一早已經安排好興趣班,幫小朋友贏在起跑線上。非洲鼓小提琴大提琴游水畫畫劍擊奧數拳擊英文班日文班西班牙文班德文班,小朋友學好佢哋,前途就一片光明(好似係)。

1900-2000:
上完以上(家長好有興趣)興趣班,小朋友終於可以食個飯。

2000-0100:

係時候找返條功課數,聽聞平時最少有八樣功課,最多試過有13樣呀。快手的話,12點就可以開始溫書,1點就可以訓。唔好彩的話……

【戴頭盔】
TSA真係好可惡㗎!因為的確有好多學校為操好成績,將試題當功課咁要求小學生做。

但換個角度睇,現今孩子失落嘅童年,係咪都關興趣班事……