毒L係優質潛力股？

(圖片來源﹕香港高登)

「不要去羨慕，不要去妒忌，真的不想得到這仙氣。」網上最近傳出一段Whatapps獨白(冇回應唔算對話)，叫人關注網路廿三條立法之後可能再冇呢類花生食之餘，仲再一次證明毒L威力驚人。

其實換個角度睇，當時人都係曲線證明自己係荀盤，奈何世人唔識貨。有見及此，小編決定教大家「欣賞毒L的正確方法」。

【看透鳥】

愛情是盲目的，但毒L的愛情是雪亮的，甚至睇到一般人望唔透嘅仙氣。佢眼中只有你，對你一切都瞭若指掌，你的優點佢肯肯定好欣賞，而缺點亦都照單全收。你唔夠高，佢會話哈比人先夠萌。你進取，一生不羈放縱愛自由嘅佢都會因為喜歡你而背棄自己理想，默默支持你。

【哲學家】

女仔都想搵個有內涵又上進嘅天王級伴侶，後現代愛情哲學家會係一個唔錯嘅選擇。佢有能力將未發生亦冇可能發生嘅事，理解成你哋之間嘅甜蜜回憶，建構出一個的人浪漫。

睇佢對緣起緣滅嘅獨特見解，就知道佢對佛學有「毒特」見解，假以時日，定必立地成佛。同班姊妹淘講「我BB係男神!」有幾威啫，我BB係活佛呀!這樣生活要慢一點……嗎?

【戲劇大師】

當你寂寞空虛凍嘅時候，佢會使出渾身解數令你開心。最常用係開心舞，圍住你身邊打轉，仲會投你所好，買好多好多好多嘢畀你，「Pand_ra」、「D_or」、冇優惠嘅「Godi_a」等。

即使你唔理佢，佢都會繼續做獨腳戲。做咁多嘢，甚至出賣自己肉體(表演呀)，都係想你開心。係愛，係真愛呀!

【佢就係完美】

成日話男人同女人來自唔同星球，根本溝通唔到。佢為咗了解你，決定化身成比女人更感性的人。為咗保持男人嘅理性，即使明知自己係天生藝術家，都去讀工程。為咗你，佢化身「完人」，情理兼備。一切都係為你，you are the world。

【隱藏金龜】

身為一個稱職嘅毒L，係唔會有任何娛樂、社交，出軌同洗錢機會。而根據「你嘅係你，佢嘅都係你」原則，你將全權擁有佢嘅身、心同財富。

由細到大，佢哋除咗讀書同工作都冇咩好做，理論上更易成為學霸/工作霸，人工自然高啲喇!所以話，識揀一定揀毒L。

無論點睇，佢哋都係優質潛力股，只係一般只睇門面嘅投資者唔識貨。佢哋有實力得嚟又長期不被亦唔會有機會被持有，而且入場費比其他聲稱荀盤低多多聲。喺家陣買咩都死嘅市嚟講，毒L真係可以考慮返。