子華棟篤笑無可取代 網民熱捧三個原因

社會熱話

廣告

黃子華人氣又再度急升,除咗正在公演的舞台劇加場又加場外,大家亦十分懷念佢的棟篤笑金句。近日佢的金句又在網上瘋傳,網民都話睇完再睇,聽完再聽都咁有意思。

撰文:CM LO

有見及此,本網於上星期五(7月8日)在facebook 專頁搞咗個投票,睇吓網民鍾意睇邊個棟篤笑,除咗子華神之外,仲有其他笑匠,包括詹瑞文、張達明同埋林海峰。結果係子華一面倒贏哂,短短四日就賺咗12,000個like,遠遠拋離第二位嘅林海峰397個like。

投票都唔夠,好多網民仲會留言表態,話明支持子華的原因。今次小編特別輯錄大家的留言,歸納左子華棟篤笑成功三大因素。

原因一:笑位充滿哲學意味

子華除咗做戲叻,講到子華嘅學歷,原來佢係讀哲學出身。網民都分析到每次子華搞嘅棟篤笑都會滲透好多哲學思想,每個棟篤笑內容都涉獵政治、民生、人生道理等,句句有共鳴,堅係唔離地!

原因二:香港棟篤笑始祖

有網民就對棟篤笑呢個名十分考究,認為上述四人之中,只有子華先係棟篤笑,其他只係搞笑SHOW。

確實,「棟篤笑」個名都係由子華改嘅,係名副其實的棟篤笑始祖兼一哥,實力無可匹敵。

原因三:忠心粉絲 鍾情子華

子華棟篤笑嘅魅力沒法擋,冧掂唔少粉絲。有網民話,唔理幾錢都要買飛入場支持;亦有網民話即使買唔到飛,都會買碟一睇再睇。

不過都有其他網民認為,棟篤笑唔止以上四位選擇,建議可以加入許冠文、阮兆祥、王祖藍、盧海鵬等笑匠;另外仲有「愛情金句王」鄺俊宇、資深基金經理黃國英、基督教界嘅林以諾牧師,仲有我地嘅特首,口味認真特別,大家又點睇呢啲另類笑匠呢?