黃子華《末世財神》啟示錄  25年前預言 今日應驗|網民熱話

黃子華《末世財神》啟示錄 25年前預言 今日應驗|網民熱話

網民熱話黃子華喺1994年嘅《末世財神》棟篤笑預言︰「你只需擁有一層500呎嘅樓,閣下就係富豪。依家唔買,遲啲要做300呎富豪,再遲啲係100呎富豪。」25年後,預言今日應驗。

撰文:肥比| 圖片:新傳媒資料室、資料圖片

以今年開售的市區劏房新盤深水埗AVA 228為例,最細一伙僅單位只有129方呎,挑戰人體極限。依家100幾呎樓都當豪宅賣,估唔到1994年棟篤笑笑話已經變成事實。到底《末世財神》棟篤笑仲有咩關於錢銀買樓嘅金句值得大家參考?

黃子華, 末世財神, 棟篤笑, 生意, 理論, 金句, 職場, 網民熱話
資料圖片

黃子華《末世財神》- 金錢觀

「點解要戴撈?因為你唔戴撈,你有乜資格話時間係寶貴,你睇我只撈每個鐘皮幾嘢,你嗰啲幾嚿水,我點同你一齊食飯啊,大家時間觀念都唔同。而最緊要你戴撈表示你有幽默感,勞力士,有邊個靠勞力揾食嘅人可以戴得起勞力士?越戴勞力士就表示你越唔使用勞力,呢種就叫做幽默啦。」

「發財都要有個方法嫁,有咩方法好得過不勞而獲呢?不勞而獲嘅發財方法就係唔使方法,唔使方法就係最好嘅方法啦,我覺得我哋想發財已經想到一個禪嘅境界啊!」

黃子華, 末世財神, 棟篤笑, 生意, 理論, 金句, 職場, 網民熱話
圖片:新傳媒資料室

黃子華《末世財神》- 買樓

「如果香港咁好,點解我哋仲有深水埗?深水埗就係要嚟懲罰嗰啲唔發財嘅人。」

「我哋人類嘅智慧,而家係唔能夠明白人類點樣可能得到第一躉樓。但係好彩我哋有牛頓,牛頓第八定律話左畀我哋聽,大家記住啊好緊要啊呢個定律嚇,就係有樓有樓,冇樓冇樓,有樓可以變冇樓,冇樓就永世都冇樓啦。」

黃子華, 末世財神, 棟篤笑, 生意, 理論, 金句, 職場, 網民熱話
圖片:新傳媒資料室

「而家一躉500呎嘅樓就值五百萬,一躉500萬嘅樓就屬於豪宅。換而言之你只需要擁有一躉500呎嘅樓,閣下就係富豪。一躉500呎嘅樓差唔多已經係最細嘅樓,如果500呎你都買唔起,你差唔多註定呢一世都要瞓街。世界上有邊個社會好似香港咁犀利,你一係做富豪,一係就瞓街。幾勵志咧,係唔係?」

黃子華, 末世財神, 棟篤笑, 生意, 理論, 金句, 職場, 網民熱話
圖片:新傳媒資料室

黃子華《末世財神》- 社會主義

「我覺得你話共產主義唔係話唔好,個問題係如果你國家得四個人咪幾好囉,最好就係另外個三個人仲有錢過你就更加好啦。」

「而家已經再冇人會關心毛澤東響歷史中嘅價值。大家只係關心佢嘅市場價值,冇人再關心毛澤東嘅思想仲存唔存在,最緊要佢條屍仲存在,因為佢條屍仲揾到錢,好多人想排住隊去睇。」

黃子華, 末世財神, 棟篤笑, 生意, 理論, 金句, 職場, 網民熱話
圖片:新傳媒資料室

「點解我哋以前咁驚97就係因為我哋驚冇左呢個600萬嘅市場之嘛,而家我哋有十億我哋仲驚600萬,你試下去吃嘢吃十億俾600萬貼士啊,個侍仔掟返俾你啊。600萬相對於十億,貼士都不如啦,當年點解滿清將香港俾咗英國啊,貼士嚟之嘛。」

 

黃子華, 末世財神, 棟篤笑, 生意, 理論, 金句, 職場, 網民熱話
圖片:中新社

黃子華《末世財神》- 投資

「玩股票好似賭馬咁,我覺得股市有得分析嘅咩?以前我哋香港個市呢有啲人就叫做大鱷,搞亂曬等你冇得分析,而家冇大鱷啊,而家啲叫大摩,摩根史丹尼,佢話要個市升就升要個市跌就跌,好似玩魔術咁樣啊。有啲人話我聽,摩根史丹尼嘅真名就叫做大衛高柏菲,你識唔識得點樣分析大衛高柏菲點樣變走個躉嘢啊?我就唔識啊。」

「每當我哋最絕望嘅時候,佢就畀我哋聽一首音樂,呢首音樂(六合彩開獎音樂)能夠起死回生,救贖萬民,一聽呢首音樂,即刻充滿希望。我覺得咁啊真係證明左香港真係一個法治唔係人治嘅地方,願六合彩常與你們同在。」

黃子華, 末世財神, 棟篤笑, 生意, 理論, 金句, 職場, 網民熱話
圖片:新傳媒資料室

黃子華《末世財神》- 搵錢

「我大個咗可以做嘢揾錢了,發覺原來我係鐘意錢,我唔鐘意做嘢。即係你一個人,鐘意高潮但係唔中意做愛,你話俾我聽你點可以得到嗰樣嘢呢?」

「當你唔中意做一樣嘢都要去做係為咗錢做呢,就同做雞冇乜分別。咁當然做雞就好啲,就揾得多啲。啊唔係,你做醫生你揾得多啲,係呢啲咪係高級雞咯。如果你就算做醫生都好啦,你做果樣野唔係因為你鐘意去做,係因為為錢去做,你應該同你啲病人講,即係我做醫生呢啲嘢,你唔好同人講啊。」

「人生裡面甚至係死亡,都唔係最可怕,最可怕嘅係當你離開呢個世界嘅時候,你發覺呢個世界,仲有好多錢等住你去揾。」