316萬元入國際學校 飛英國讀書平過留港

316萬元入國際學校 飛英國讀書平過留港

「贏在XX前」已經滲入新一代香港父母的育兒思維,啤出無數「怪獸家長」,佢地不惜一切為子女搭橋鋪路,希望子女可以順利入到心意學校。無他嘅,有邊個父母唔想望子成龍?

撰文:CM LO

而國際學校一直都獲港爸港媽垂青,近期再有英國名校來港加入「貴族學校」行列,最霸氣嘅係入場費最少要畀316萬元,分分鐘貴過親身飛去英國讀書。

該新校名為香港凱莉山國際學校,是由英國傳統寄宿學校Mount Kelly School開設的分校,為5至13歲兒童提供1至8年級的英國課程。校方最終落實明年起在屯門掃管笏分階段興建校舍,2017至2018年度會率先推行首4個年級的課程, 一共提供420個學位。

開初提及該校入學入場費要316萬?冇錯!有數得計!校方指,學費一年約為15.5萬至18.5萬元,同時要求報讀學生必須 持有192萬元的個人提名債券,先有機會入讀,即係話唔係100%肯定攞到學位。

買張入學債券都要百幾萬,對於平民百姓嚟講,上到車畀首期都仲有凸。其實國際學校以出售債券方式集資,已經唔再係新聞,香港有多間貴族國際學校的債券一手都要十萬至幾百萬不等。

所以想入讀凱莉山國際學校嘅小朋友,仲要計埋購買債券嘅支出;

如果小朋友讀足8年,用最低學費計:

15.5萬 x 8 + 192萬=316萬

(若不獲取錄或者一直就讀至完成8年級,即可獲全額退回 債券款項。)

小編有見近期英鎊平到笑,即比較兩地讀書的入場費,發現原來親身飛去英國讀書仲平!參考英倫海外升學中心網站資料,係英國就讀小三至中二的學生,每年平均學費及雜費約要33,000英鎊,兌換港幣約需33.3萬元(以10.1算計);

如果小朋友讀足8年,學費需付:

33.3萬 x 8 =266.4萬

香港凱莉山國際學校的入場費足足貴18.6%。可能有人會反駁,去到英國讀書仲有其他額外開支,例如監護人公司費用、往返機場的交通費用、考察、買參考書等等,拉均返條數,費用可能真係差唔多。但比較之下,英國的讀書環境、生活質素都較香港優勝。

各位港爸港媽,你會點揀呢?

更多相關文章:

【國際學校債券大跌價 二手平過一手】

http://www.edigest.hk/Vip/detail?id=2597

【英倫升學洗費預算】

http://www.edigest.hk/Vip/detail?id=2881

The user will never see this