國泰大裁員

國泰大裁員 炒600人 做個小測試 即知你會唔會被炒?

職場

廣告

裁員新聞經常有,當中不乏大公司,早前預告會裁員的國泰航空(00293)今日宣布,將裁員約600名香港總部員工。

我地呢班打工仔聽見呢啲消息,真係嚇到個心都離一離,擔心下一個被裁的係自己!想知道自己係咪被炒高危族,小編根據坊間人力資源顧問的資料,整咗個心理測驗俾大家,做完就知道自己隻飯碗穩唔穩陣。

A型:危機指數100%

根據人力資源顧問公司的資料顯示,如果你從事金融、銀行、零售、物流業,咁啱你崗位又係資訊科技、人力資源或者行政部,仲要你個位有兩個或以上,你請假時可以好輕易搵到人接替你的工作,仲要年過40,做咗超過成廿年,人工高到超過6萬,仲要咁不幸係細小部門做,咁就真係恭喜哂,真係執定包袱都得,公司有咩事起上黎,第一時間會諗起你。

B型:危機指數80%

拿拿拿,唔好以為唔係高危行業就冇事,如果你返工好似黎發夢咁,成日做錯野,又話份工無聊,個老細又衰,遲到早退係基本,成日唔見左人,做唔夠兩個禮拜又走人,做黎做去都係基層職員冇得升職。返工抱住側側膊唔多覺既心態,真係遲早都玩完。若然未炒,都係時辰未到⋯⋯

C型:危機指數60%

唔係高危行業,又唔係對份工有熱誠,見到老細就閃一閃先,博大霧望佢睇唔到,咁佢都搵你唔到啦,仲點炒你,你有份工hea下hea下又冇壞既,相對安全少少。

另一種係都係鐘意份工,都叫盡忠職守既,之不過呀老細點都醒唔起你係邊個,叫極都叫唔出你個名,次次都以為你係新人,「呀邊個呀邊個」就係老細對你既印象,即係話,你係老細心目中都冇乜特別印象,可有可無,所以最好都係醒醒定定啦!

D型:危機指數40%

如果你中哂所有高危徵狀,不過又咁好彩係大部門返工,你成日冇事做行黎行去懶親民,老細念在係老臣子份上,都仲有得留低。仲有個種對份工有熱誠,唔會駁老細咀,叫做野永無托手踭(雖然轉個頭畀哂下屬做),態度都唔錯。不過老細左右手始終輪唔到你,咁你就要努力啲啦。努力啲做咩?自己諗下啦!

E型:危機指數20%

做到老細冇左你唔得,你冇返工個日公司好似七國咁亂既話,咁你都安安樂樂啦!之但係,間公司其實可能會執笠,到時都係要拎大信封架啦⋯⋯

F型:危機指數0

如果你唔洗返工,咁就冇人炒到你,又唔洗驚遲、俾老細照肺⋯⋯不過,首先你要有個富爸爸。

高危行業知多啲

金融、銀行、零售、物流業係高危行業,因為金融同銀行實在太多競爭,零售業由於而家市道放緩,加上冇咁多大媽落黎掃貨,自然生意差。另外,大陸經濟增長減慢,出口疲弱,外貿需求減少,所以物流業亦係高危行業。