向公司的清潔工致敬 7個原因 冇佢唔得

向公司的清潔工致敬 7個原因 冇佢唔得

公司有種人,係食物鏈嘅最高層,但佢又唔係真係高層,不過你哋所有人都最不能沒有佢,佢哋,就係清潔姐姐同叔叔們。至少有7個原因,一定要多謝佢哋。

1. 保持地面清潔

如果公司無咗呢班清潔姐姐叔叔,咁就無人去幫你個位吸塵,而本身都擁有一張藝術家枱嘅你哋,枱面都已經咁亂,更何況個地下?

2. 你枱面唔記得清走嘅食物殘渣

清潔姐姐叔叔們都有對污垢X-ray眼,對於大頭蝦又邋邋遢遢嘅同事就梗係不能沒有佢哋,因為呢類人通常都會將食完嘅糖紙、包裝紙、甚至杯麵等等就咁放係位久久不清,仲有啲為人污糟嘅同事,成日留低啲茶漬糖水漬喺枱面咁,放多幾日真係隨時惹來一大隊蟲蟲特工隊!身邊同事都真係多得佢唔少,好在有呢啲清潔姐姐叔叔掃描到呢啲清潔隱患,先唔會搞到要全公司撤離滅蟲!

3. 保持廁所清潔、紙巾長用長有

廁所清潔有幾重要唔洗講喇掛?斷估你見到廁所板上有鞋印或者尿漬,你都始終會有啲不安嘅!而全靠有清潔姐姐叔叔幫我哋日洗夜洗,我哋先有乾淨嘅廁所用!而肚痛去廁所嗰陣,你最驚發生嘅係咩吖?就係無廁紙呀!好在有清潔姐姐,先保到我哋唔洗面對呢個咁尷尬嘅局面。

4. 保持茶水間乾淨、雪櫃無異味

好多無公德心嘅人鍾意將自己洗完嘅飯盒就咁掉喺Pantry搞到周圍都係水漬、Sink盤又爆晒咁嘅局面,呢啲情況都係多得啲姐姐叔叔幫佢哋執手尾。

同埋雪櫃用耐咗就好易有異味,都係全靠清潔通才嘅佢哋幫我哋處理好咋!

5. 一有著數就會嚟益你

通常清潔姐姐叔叔都會負責幾個部門嘅嘢,亦會收盡幾個部門嘅著數,例如啲優惠券呀、邊度有平嘢嘅情報咁。如果你同姐姐有返咁上下交情,你都一定會透過佢得到唔少好處,慳返唔少。

6. 爸爸媽媽Feel

有啲公司嘅清潔姐姐叔叔除咗會幫你打理公司嘅清潔尤關細務,仲會煲返啲滋補湯水俾各位同事飲,令你捱到死死吓都可以進補一下。而大部分嘅姐姐仲會同你談笑風生,做咗幾十年人,有時你遇上啲煩惱同佢傾,佢仲可過到唔少經驗或者人生大道理俾你,獲益良多呀。

7. 公司天文台

作為唯一可以穿梭各大部門嘅職員,清潔姐姐叔叔絕對係全公司嘅第一號收風人物。幾時準備炒人升人,佢分分鐘仲清楚過你直屬老細!

所以換句話說,絕對唔得罪得佢哋,否則你嘅衰嘢同樣會秒速喺公司上下傳播開去。

相關文章

關鍵詞
清潔工