月入$13,000要俾家用 6招每月慳出$5,000 儲蓄為王

月入$13,000要俾家用 6招每月慳出$5,000 儲蓄為王

理財

廣告

一個新鮮人出黎工作,開始覺得份人工唔係好夠洗,好難儲到錢。平日,又多聚會,返工又遠,計一計,真係樣樣都係錢。但係份人工月月清真係唔係好得,於是就定下月儲$5,000目標。望一望條數,其實都唔係做唔到嘅。以下就有6個貼士俾大家!

1/ 搵平靚正食店

出黎工作之後,少咗好多同朋友見面相處嘅時間,夜晚出去食下飯吹下水都要嘅。呢筆錢可以話係冇得慳呀!呢啲聚會既然冇推,就諗下計食平啲。當大家都問食咩好嘅時候,一定要提出意見,搵定一間平靚正嘅食店。如果唔快啲講,一個唔該就要食貴嘢,咁一個月計落都可以慳多$600。

娛樂消遣: $200×3日x4星期=$2,400 >>> $150×3日x4星期=$1,800

 

2/食煮家飯

帶飯真係可以慳好多,上環食個晏一啲都唔平,最少都四五十蚊一個飯。日日都出去食的話,條數都實在唔少。但係都要出去食下飯同同事聯絡下感情嘅,所以一星期都可以留返兩日出去食,一個都可以慳返$600。

五天工作 不帶飯 五日飯錢 $50×5日=$250 x4星期= $1,000
五天工作 三天帶飯 兩日飯錢 $50×2日=$100 x4星期= $400
$1,000 >>> $400

3/繼續同屋企人住

香港地講到衣、食、住、行四方面,最貴一定係住。所以冇咩特別原因的話都最好同屋企人住,唔好自己搬出去啦!自己一個住一闊三大,會用多好多錢。最緊要俾返多少家用屋企就得啦!

4/保持身體健康

玩咩,保持身體健康都叫慳錢?梗係啦!睇一次醫生要用成$250-400,如果情況太差,仲要睇多次醫生。咁條數就真係好貴,所以平日都要多食生果、做下運動,身體健康就用少一筆醫藥費。

5/用港鐵$2優惠

有優惠一定唔可以放過,如果你附近有港鐵特惠站,就記得行多兩步去拍一拍。一個月每日慳$2都可以慳多$60蚊。反正都係行多兩步就可以平,何樂而不為呢?

6/ 放工快啲返屋企

好多時喺街行下行下,唔覺意就買多咗件衫,買多對鞋。所以為咗減少自己買咗啲多餘嘢,放工之後就唔好周圍逛,都係快啲返屋企好啲。