股東會著數多  有酒店餐食  燜燒杯當紀念品

股東會著數多 有酒店餐食 燜燒杯當紀念品

買股票除咗收息兼賺股價升幅,原來仲有好多著數。因為上市公司每年都會舉行股東會,唔少公司都會有酒店美食請股東,部分仲會在酒店、高級酒樓大排筵席,亦有公司會送禮品。以下就係部分例子:

自助餐、午宴類

長和系公司﹕長江生命科技(00775)、長和(00001)、長實地產(01113)、長江基建集團(01038)


每年股東大會後,都會在旗下紅磡海逸君綽酒店,設午宴請股東食飯;通常有點心、炒飯、炒麵同埋甜品,一貫酒店質素,都幾抵食。

萬邦投資(00158)


每年股東會後都會在中環翠亨村擺十幾圍午宴,食物一啲都唔cheap,點心呢啲基本野實有,但連盆菜、冬菇蠔豉、海皇羮的高級食物都有,就真係唔簡單,加埋唔使同人爭食,贏哂啦!

香港小輪(00050)


今年股東會在集團旗下的美麗華酒店舉行,安排30幾圍中菜,又係酒店餐,質素有保證。

花樣年控股(01777)


在全港最豪的四季酒店舉行股東會,每位股東仲可以打包兩人份的下午茶甜品,四季酒店食物一啲都唔平,估計都有400元。

禮品類

中電控股(00002)


中電好鍾意送關於環保節能的小禮物,舊年股東會送香草種子,但可能有股東嫌麻煩,今年竟然每人送一隻燜燒杯,會唔會太好呀!!坊間一隻燜燒杯平極都200幾蚊,再加埋每年賺的息,最近股價仲創埋歷史新高,做中電股東真係賺盡。

華潤水泥(01313)及台泥國際(01136)


好多公司都會提供西餅畀股東即場食,不過潤泥及台泥就好體貼咁,送50元西餅禮券畀大家返屋企慢慢食。

生力啤(00236)


每年傳統都係到股東會「啤一啤」,有免費啤酒任飲。雖然隻股每年冇乜息派,但都有幾罐啤酒送,好過冇。

維達國際(03331)


股東會上,成袋紙巾任股東拎,你拎到幾多就拎,隻手大啲,真係可以幾個月唔使買紙巾。

騰訊控股(00700)


真係估你唔到,紀念品係每人一隻QQ公仔。市面上冇得賣既,都算係無價啦。

如何出股東會?

要出席股東,當然要先成為股東,買入相關股票。如果你係持有實物股票,只要股東會當日帶身份證到現場登記便可,如果是透過證券行或銀行持有股票,則需通知有關證券行或銀行,部分需填表格,部分則打電話就OK,要自行問清楚。

另外,理論上持有1股也可以出席股東會,即是你以現價約90元買入一股長和碎股,連印花稅、佣金及提倉費,大約再加額外200元成本,即是約300元左右,你便可有權每年到長和股東會任食,食一餐隨時回本。

The user will never see this