返工秘笈 10種你要認清真面目的同事

獨家村類

1. 低頭族

可能你返咗成個月工後喺街都唔會認得佢，皆因佢無時無刻都對住部手機，你從來無正面望過佢，平時溝通可能send email都會比面對面講更快得到回覆。

2. 包公

有啲人真係日日都嬲咗全世界咁嘅樣，睇落尖酸刻薄；而有啲人就係天生黑面樣，但見到你都仲係會笑一笑示意。不過又有啲人明知自己天生黑口黑面，但見到人同你打招呼都仲係保持住佢心目中覺得只係「木口木面」嘅樣，好難同佢消除隔膜。

3. 刷鞋仔

為求上位而時時刻刻對老闆笑口勢勢，對住同事就另一個樣。佢哋想點，不解釋啦。

麻辣製造者類

4. 完美主義者

永遠都有嘢睇唔順眼，對住佢哋，你淨係呼吸都會犯錯。明明大家平起平坐，但又唔明點解佢好似成日可以責怪你呢樣嗰樣。

5. 無禮貌

當你幫佢係應份，唔識講唔該，亦唔會要求你同佢講唔該。見人唔會打招呼、走人唔會講拜拜，佢哋神出鬼沒。

6. 自私精

一支筆、一張紙、甚至一張memo都會同你計住計住，你有著數益佢就即刻出現，佢有著數就一定潛水。

7. 是非精

每一個細節都觀察入微，加入好多個人分析同見解，或者仲扭曲咗部份事實嚟迎合聽眾口味，然後暗地裡同全世界分享，影響全世界對當事人嘅印象，除咗當事人。

公主王子病患者類

8. 卸膊

「唔關我事架喎」、「唔係我跟架喎」、「嗄我pass咗畀呀Mary好耐喇喎」、「做乜你無同老闆講XXX架」。

9. Hea-Do-er

求求其其得過且過，但求有啲實質嘢拎出嚟喺老闆面前揖揖揚揚，但係下個同事一接手就一定嬲到想殺佢全家。

10. 老屎忽

「你哋啲後生唔好成日喺度怕蝕底先得架」、「食鹽多過你食米」、「公司有我先捱到今日咁」、「呢啲嘢我以前做得多啦」。佢哋份人工出嚟畀佢哋返嚟消磨時間再享受人生，作為新人嘅你做咩都係錯，唔好太介懷，佢嘅出現唔係做你同事，而係你職場上嘅慈母。

延伸閱讀：10個好同事特質

一日返工返至少八個鐘，一星期返五日，真係唔好講笑，見同事多過見屋企人。所以身邊有一班好同事，真係好重要。如果你公司有幾個好同事，做起嘢上嚟唔單只得心應手，仲可以返工返得好開心添！以下小編就綜合咗10個好同事特質，睇下你或者你嘅同事有冇中啦！

1/ 抵得諗

日日咁多嘢做，有時都會做唔切或者有啲甩甩漏漏，呢個時候，有個抵得諗嘅同事就幫你唔少。佢唔介意幫你執手尾，毫無怨言咁幫你頂咗一啲你唔想做嘅job。嗱，如果你身邊有個咁嘅同事，真係可遇不可求，你一定要對佢好啲啦！

2/ 積極向上

工作少不免要食下「豬頭骨」，正當你愁眉苦臉、唉聲嘆氣咁食舊豬頭骨嘅時候，有一個同team嘅同事用一個積極嘅態度，笑笑口咁話同你一齊拆掂佢。突然就好似舊豬頭骨，冇咁難食，啲嘢冇咁難做咁。

3/ 功勞開心share

有一種同事係好鐘意一個人攞晒全team人嘅功勞，明明佢就冇咩貢獻，偏偏功就佢領，點諗條氣都唔係好順。但係相反，有一種同事會功勞開心share，絕不獨食，即使idea 係佢提出，佢都會比機會其他同事參與，等大家可以一齊share工作嘅成果。

4/ 聰明

有冇聽過「同蠢人做同事容易有心臟病」嘅報道？呢個係來至瑞典林德伯格大學的研究，文中指，蠢人同煙一樣，都係對人體有害，分分鐘俾人激死。所以如果你有個幾個聰明嘅同事，咁激你少啲，你身體應該都會健康啲。

5/ 口密同事

返工返全日，少不免會傾下自己日常生活發生嘅事，如果你咁唔好彩講咗俾個好口疏嘅同事知。相信不出半日，你嘅事就會全間公司都知。所以有個唔多口嘅同事都好重要，咁你就可以暢所欲言啦！

6/ 有商有量

最怕有啲同事咩都話冇得傾，咩都要跟晒佢嗰套。其實大家都有自己一套做事方式，有時大家未必可以配合得好好，但係做嘢係講合作精神，大家有商有量，工作先會事半倍架！

7/ 冷靜

唔係每一份工都會經常遇到一啲突發情況，不過如果你份工成日都有突發情況（可能係PR、記者、船務等等），你就會發現一個冷靜嘅同事有幾咁重要。佢可以喺一片混亂之中指揮大局，掌握事態發展，喺緊張關頭擔任一個好重要的角色。

8/ 有反應

你可能會諗，唔係掛，有俾反應都係一個好同事特質？乜唔係基本架咩？梗係唔係啦，有啲同事真係十問九唔應，完完全全活喺自己嘅世界。但係如果你嘅同事好識比反應，可以令你好有存在感同受尊重，受人尊重點都係開心嘅。

9/  搞笑爛gag王

返工做嘢咁辛苦，身邊有個有幽默感嘅同事可以令你返工返得輕鬆又開心，為你苦悶嘅工作帶嚟唔少歡樂。

10/溫文謙虛

有冇發現身邊有啲同事，好鍾意口不停咁同你分享佢嘅經驗，或者講佢之前做過嘅豐功偉績，不停讚自己，聽得多其實都幾煩。但係如果你同事係個謙虛嘅人，同佢地相處就會舒服好多，亦都唔使不停聽佢自吹自擂。