點唱錢最抵最方便？ 4大兌換外幣方法 | 生活趣談

原文︰新假期｜圖片：新傳媒資料室、unsplash｜整理：亨利

香港唱錢定當地兌換好？

除了日圓及歐美貨幣，泰國、台灣及韓國都係去到當地先兌換 ，匯率會較高，而去冷門地方，就建議先兌定美金傍身。

直接去銀行分行兌換 ，成日遇上冇現貨、兌率唔靚等罪名，我寧願去找換公司。

港島首選上環牛記，九龍揀尖沙咀重慶堅成或深水埗發達鳥，打死都唔會專登去百年，又要排隊又多規矩仲要受氣同搭佢部跳樓Lift！

牛記找換

地址：上環急庇利街1號長達大廈地下

堅成找換

地址：尖沙咀彌敦道36-44號重慶大廈地下87號舖

發達鳥找換店

地址：深水埗長沙灣道 226-242號深之都商場2樓129號舖

去到海外先兌錢得唔得？

當然得，最方便首選自動櫃員機，以當天匯率計算，最方便快捷！

記得出發前要在香港開通海外提款服務，並設定一日最高提款額。

現時大多提款卡屬於銀聯，每次收取$15-$25手續費，PLUS/Cirrus 等收費$20-$50，只有Citibank 費用全免。

每日提款上限根據不同發卡公司而定，以恒生為例，每日最高提款額可自選$10,000或$20,000。

不過我都試過原因不明而無法提款，非常狼狽！

有咩方法兌換最方便快捷？

在香港 兌換 外幣，仲有以下四種方法：

01 | 預訂機場取

在通濟隆（Travelex）網上預約，再在機場領取，比即場 兌換 平，而且有42種貨幣，冷門到斐濟元都有！
缺點：匯率未算最抵，冷門貨幣要先早三日預訂。

02 | ATM即撳

匯豐銀行在全港九新界有6部自動櫃員機，可以24小時直接提取外幣，包括日圓、美元、歐元及人民幣。
缺點：每日有限額，選擇不多而且匯率偏高。

03 | 外幣戶口電匯

開設外幣戶口，再透過網上或電話eBanking，以電匯價（T/T Rate） 兌換 後，再在銀行提取。匯率最靚，可參考TTrate.com。
缺點： 提取貨幣設限額，如匯豐每日只可提取¥75,000，大額要分幾日攞，而且並非有齊所有貨幣，須1至2天前預訂。

04 | Whatsapp柯打

豐盛外幣找換（fb:Chui Tai Tai），經whatsapp報價確認，由專人送貨到港島區寫字樓以現金交易，金額過$5,000可免交通費，真心方便！
缺點：須3至4日前預約，只有口頭報價而沒有單據。

使唔晒！用剩外幣點算好？

換回港紙預咗蝕錢！如是常用貨幣，建議留待下次再用（除非預計匯率暴跌）。如果堅持要換回，可以在任何一間Travelex 回購，如出發前在Travelex 唱錢額外付$40，回港即可享有優惠回購匯率！

日本成田機場設有TravelersBox，可以將餘款轉成PayPal、iTunes、Starbucks 等面值卡。

曾試過用剩冰島克朗，返到香港冇人收！冷門貨幣最好返港前先唱回歐元、美金或其他貨幣，否則血本無歸！