【頭搖又尾擺】90後賣飄移卡丁車 月入10萬元

創業

廣告

咪睇圖中車仔細細,以為玩具車冇料到?用佢來飄移,隨時勁過《頭文字D》的AE86,不過首先你要係車神。

「有機會就試吓創業,一年唔得就兩年。冇嘢輸,錢冇咗可以再搵,但機會過咗就冇。」五位九十後年青人,Gary,Predick,Terry,Alex及Barton,自掏荷包50萬元,於觀塘開設3,000呎的Crazy Cart試車場,將飄移快感引入香港。

「我們五個都係愛車之人,自細鍾意揸車,有日喺網上搵到呢架車,既係電動又可以玩飄移,所需場地不大,好啱喺香港玩。」

五位創辦人,左起﹕Gary,Predick,Terry,Alex,Barton(圖片來源﹕受訪者提供)

Crazy Cart由美國公司Razor研發,本來的設計與一般玩具卡丁車無異,對象為4歲以上兒童。2013年,公司將Crazy Cart加以改良,只要拉起連接後輪的飄移桿,後輪即可自由轉動,飄移話都冇咁易。

重生後的Crazy Cart引出一班「大細路」,公司亦乘勝追擊,分別推出最高負重240磅的Crazy Cart XL、及最高負重140磅的Crazy Cart。

睇準商機,他們將Crazy Cart引入香港。「買對鞋都要試,一架Crazy Cart至少幾千元,冇理由唔畀人試吓先買。」

他們選擇在觀塘工廈作為基地,不過由於大廈樓齡舊,二來上手是速遞貨倉,剛接手時個場都幾混亂,所以50萬元的創業基金中,有30萬元用於裝修試車場,佔開支比例最多。

場內所有裝修都是由五位老闆親手做,請來裝修師父教路,邊教學邊整。學學吓,仲學到開埋另一間工程裝修公司,真係唔講得笑。

「下次返貨要3月尾。」試完啱玩都未必即刻有貨。

Alex透露,開業至今兩個多月,已賣出約20多架Crazy Cart。客源未算隠定,但試車場平均每月月入已達約10萬元,純利6萬元左右,預計七至八個月後可以回本。

他們的客源主打香港人,不過未來都會發展內地市場。由於美國貨品不能直接入口中國大陸,再加上內地中產家庭都相當著重兒童玩具的品質,對美國貨尤其喜愛,所以內地市場的潛力確不能睇小。

「其實我們已經做了兩單批發,一單在廣州,另一單在北京,每次利潤約60,000至70,000元。」Alex說。

現在他們的公司更開拓貨車車胎貿易生意,希望收入多元化。「年青人,始終咩都想試吓。」眼見來試車場的客人都是有車族,未來亦有機會開真.車房;亦有可能開分店,試做賽車場或是Show Room,一切都在計劃中。

年輕人的魄力,真的不能小覷。

飄移卡丁車 Crazy Cart小資料
試車收費:
星期一至四(1230-2330): $79/10Mins
星期五至日及公眾假期(1130-0000): $88/10Mins
Facebook:
https://www.facebook.com/crestmertontech/