【90後創業】創業資金8萬  工廈開茶館專攻年輕女性市場

【90後創業】創業資金8萬 工廈開茶館專攻年輕女性市場


一講茶道,很多人都以為只有老人輩才會欣賞,但90後的Catherine卻以此作為創業起點,在工廈內開茶舍。

茶室外望,層層工廈的夾縫間,有一座被霧氣纏繞的山。白霧隨風流動,那處的綠時濃時淡。室內各處擺放不同的小盆栽,彷彿令人與自然重新連結,短暫擺脫生活的煩惱。淡黃的燈光,令茶面的輕煙更添美態。

茶變化萬千,不同的水質、水溫均會影響茶的味道;人也一樣,在不同的環境下,都會有無限的可能性。

自行創立品牌

Catherine自小留學英國,在相對開放的學習環境下,有更多時間思考自己的興趣及未來。「人各有志,人的一生好短,點解唔追夢?人舒服就唔再嘗試其他可能性。當你年齡愈大,責任愈多,你就唔會追夢,因為再輸唔起。」

自第一份實習起,她就知道自己不是打工的材料,怕悶又重複的生活。碰巧當時做茶葉批發的媽媽需要創立一個品牌,種種巧合下促成了瑜茶舍的誕生。


店內的包裝都是由Catherine設計。

訪問之先,Catherine已泡好一壺普洱。素白的瓷杯更顯茶的金黃,小喝一口,溜滑非常,吞嚥以後更有回甘。

「未畢業,我已經做branding。自己做包裝,自己做設計。」Cahterine說。雖然自小已對茶有相當認識,但開創一個新的品牌,初期仍然感到很大壓力。

「上年6月底簽約,2015年10月開業,自己一手一腳搞傢私、裝修。開眼閉眼都係茶室,心理壓力好大。」一向甚好的母女關係亦因為茶室一度變得繃緊,「剛起步時,與媽媽的衝突很大,因為做事各有一套。現在佢放手畀我搞,關係好好多。初時我們的對話只有茶,好似有個同事喺你旁邊一樣。」Catherine笑言。

Catherine以月租10,000元租下這個約600呎的茶室,平均呎租13元。問到為何要將高雅的茶室開在格格不入的工廈內?「搵過好多唔同區的地鋪,唔係太大就係負擔不起。難得呢個單位不大,而且呢區多藝術家。」

每月收入10萬元

茶室開業後生意不俗,每月收入約10萬元,開支約30,000元,而撇除入貨成本,開茶室所用的80,000元開業成本(租金、茶具、傢俬等)已全數回本。Catherine亦致力開發網上生意,專攻年輕女士,一般100元至200元即可交易。

也許有人認為她的成功全靠「母幹」,因為媽媽做茶葉批發,所以開業成本才可以如此低,但Catherine卻只視此為優勢,「我好彩,因為我媽媽,我有條件做。但我唔係做媽媽一樣的生意,我係利用我的優勢,再去重新演繹。無論做咩都有人講,其實唔需要其他人點睇。」


普洱以外,茶的品種多不勝數。

幾泡水後,茶由金黃轉成深啡,香味更轉樸實,但甜味卻愈喝愈濃。配上佐茶的杏仁酥,更能突出茶的甜味。

Catherine不單想賣茶,她更加想做到的是推廣生活方法。「太商業反而冇意義,亦很容易被淘汰,因為你不單是Sell產品,而是Sell品牌的理念。」

茶室除了品茶會,還定期有很多Life Style的活動,茶道、插花、二胡。「除身體上,我覺我香港的都市人都好需要心靈上的療癒。」衣食住行以外,香港人也許更需要心靈上的治療。

想知道如何泡一杯靚茶,Catherine在VIDEO亦有親身示範

yú teahouse 瑜茶舍
地址﹕香港沙田火炭坳背灣街33-35號世紀工業中心14樓B室
電話﹕2359 3988
Facebook:https://www.facebook.com/yuteahouse/

相關文章