當你願意貼錢返工

文章授權： 我做Marketing

有人會認為呢個做法匪夷所思，但現實的確有唔少人正在如此過活：

明知公司冇得claim的士錢，做到凌晨12點，自己都選擇call 85折的返屋企，爭取多30分鐘瞓覺時間；

明知公司team lunch嘅budget只有$80 per head，但都唔介意請條team去Wooloomooloo食一餐當慶功；

明知買每一樣新文具都要入紙同HR申請，但眼見全公司四十幾人要share一個鉛筆刨，所以特登走落陳湘記書局，買多4個鉛筆刨，奉獻畀marketing team專用；

明知老細叫同事每人hand carry兩個易拉架去event，但你自己就早兩日出錢將所有物資courier晒去場地。

雖然錢唔係萬能，但好多時都可以買到方便、賺到時間同贏到人心。

每日幾十蚊、間唔中一次幾百蚊，對比起你份人工嚟講，可能只係九牛一毛，但治本嘅方法都係要管數、睇budget嘅人明白，有時使多咗錢，賺到嘅反而更多。

延伸閱讀：返工晚晚加班      赫然發現自己面癱

《返工，真係會死嗎？》

我從前都唔相信有人會因為返工而死，但而家我開始信了，因為上星期，我面癱。

上星期二，我如常加班到晚上10點，我突然感到右耳耳背有啲痛，然後右邊隻眼好似有啲不受控制，唔係好合得埋，然後開始流眼水。我用手摸摸自己嘅右邊面，發覺有的奇怪，因為摸落去，感覺有啲似一塊不屬於自己嘅豬肉。

嗰一刻我開始有啲驚。我即刻save低做到一半，但聽日要用嘅presentation deck，走入厠所，睇下究竟發生咩事。面對鏡中嘅自己，感覺有啲陌生。右邊面同左邊面好似有小小唔對稱。右邊嘅嘴角有啲不由自主地放鬆，口水亦慢慢喺嗰度走出嚟。嗰一刻，我即刻諗起官恩娜，因為佢我先第一次認識咩叫面癱。

返埋自己位，攞埋電腦，搭的士去睇急症，醫生證實真係面癱。排隊攞好藥，截埋的士返屋企已是凌晨一點半。喺的士上已經睇到來自上司嘅兩個missed call。打開Whatsapp，上司問「聽日晏晝present個deck做好未？我想睇下先」

「我啱啱去咗睇急症，醫生話我面癱」我回應。

「??」上司即時回覆，然後再typing….

「Then is your deck ready yet? I can ask Wendy to present for you if you are feeling not okie」上司再回覆。

當我正在typing準備回覆嘅時候，電話就響起。

「你塊面冇事呀嘛？」無論係凌晨一點半定lunch time一點半，上司依然係咁chur，即使佢係問緊一條看似關心你嘅問題。

「我右邊面冇咗感覺，眼同嘴都唔係好郁得。」

「咁左邊面呢？」上司再問。

「都仲ok。」我一邊抺走嘴邊嘅口水，一邊回答。

「咁不如聽日晏晝個會都係你present返，你始終對成個project熟啲。個deck你聽朝十點前先畀我啦。你唔舒服，今晚抖抖。」面對上司嘅要求我冇太大反應，簡單回應之後就收咗線。

返到屋企，我用醫生畀我嘅手術膠紙，將不能閉合嘅右眼黐埋。瞓上床，我習慣性地用手機check公司email。由晚上十點至凌晨兩點半，已經有十幾封新嘅unread email。

突然，我感覺自己好犯賤：凌晨兩點半，喺自己床上面，得番一隻眼，都仲要check公司email。點解？

經常聽到日本嘅「過勞死」新聞，總覺得離自己好遠。但呢一刻，我感覺到做嘢做到死，原來並非遙不可及。上年年尾日本電通公司犧牲嘅女職員只有24歲，佢生前負責互聯網廣告，每日平均工作16小時，即係話如果佢每朝返10點，要到凌晨兩點先有得放工。佢同我嘅工時其實差唔多，但唔同嘅係，佢後生過我十年。

朝早七點半，鬧鐘將我叫醒。我自動自覺打開手提電腦，打開尋晚未完成嘅presentation deck，希望十點前能夠完成，交畀上司。

你可能會問點解我病都仲要咁勤力？老實講，連我自己都答唔出一個能夠說服人，說服自己嘅答案。

可能好似我上司話齋，因為呢一刻，我仲有左邊面未癱，即係代表仲做得嘢。