農曆7月又到 凶宅五大賣點

農曆7月又到 凶宅五大賣點

每年農曆7月又稱「鬼月」,相傳呢個月「鬼門」開啟兼容許孤魂自由出入,所以期間有唔少忌諱,包括唔會婚嫁、祝壽、搬屋等等。雖然現今科學無法證明「鬼門」開啟,亦唔知孤魂會唔會用「e道」嚟香港「自由行」,不過有啲凶宅業主可能驚「鬼月」賣唔到樓,美國9月又可能加息無錢賺,所以近日減價急讓,部分單位更以低市價三成放盤。

其實香港唔少人都話冇樓住,加上電視劇《樓奴》入面House哥話齋「香港地方咁迫,做鬼邊會留低同人搶,死都死遠啲啦」,所以凶宅又有乜好怕喎?小編仲認為,買凶宅有五大好處添,一齊睇下有幾so~

1. 鬼同你開P

日日出街同啲FD消遣,隨時月中就做「月光族」,不過蝸居咁細,想請FD又嫌唔夠位企,見悶點算?唔怕!買入凶宅,好多鬼朋友陪伴,日日開PARTY又點會悶?

2. 唔驚畀人騷擾

唔少人都認為凶宅好多「污糟野」,唔敢住之餘,連接觸都會怕怕,所以開PARTY搞到好嘈,應該都唔會有人投訴掛?!

「哈囉喂」要指定日子玩,不過買凶宅有一班嘩鬼嚇你,就日日有得玩!

3. 哈囉喂全年玩

香港兩大主題公園每年都有萬聖節搞鬼活動,不過只可以9月至10月期間先有得玩,其他日子畀錢都玩唔到。但係買咗凶宅就有一班嘩鬼嚇你,日日有得玩「哈囉喂」,更重要係唔使錢嘛!

4. 夏天唔使開冷氣

早排香港受吹襲台灣嘅颱風反氣旋影響,氣溫一度高達37℃,唔少人選擇匿喺有冷氣地方避免中暑。不過買咗凶宅唔驚熱,皆因單位一向陰森森,唔使開冷氣都可以有一股涼意!

近期一個沙田第一城凶宅,以低市價約20%易手。

5. 樓價平一截

中國人始終對凶宅有所忌諱,所以唔少業主將單位放盤時,將價錢定低於同類型單位。近期一個沙田第一城38座高層G室凶宅,實用面積304平方呎,以340萬元易手,足足低市價約20%;另外,唔少外籍租客唔介意租住凶宅,好似去年發生雙屍命案嘅嘉薈軒高層單位,今年初有外籍客以2.9萬元租住,計落租金回報率幾高。所以只要呢啲「特別單位」定價吸引,其實都有價有市,吸引買家、租客!

相關報導:

【凶宅怨氣難化解? 麥玲玲有計】 http://goo.gl/wmn3pB

【伊利莎伯大廈凶宅 低市價30%放盤】 http://goo.gl/qAAGMP

The user will never see this