乜都唔識想學投資 可以點入手?

社會熱話

廣告

問1:龔成老師你好,我就未掂過投資呢門工具,但我其實想投資好耐,只係唔知點樣去行第一步,因我都未搞清楚成個系統,亦睇唔明啲數字,所以好耐都未去接觸。今日有個朋友咁講開又介紹我呢你個專頁,令我明了好多,但我都想請教,我現在係需要咩?同留意咩?

龔成老師答:
你需要知識,你可以睇下書,上財經網站,留意財務新聞,上一些股票班。
你要明白,股票是理財的一環,而理財是分配,不是炒賣,你要將資金作出分配,配置在有優質的股票上,令自己的財富長期增值。
作為初階者,你可從穩健的股票著手,收息股、公用股、房託,這些股票不少都很穩健,你可了解下先。下一步就是開股票戶口。
另外,你未有捕捉平貴的能力,投資時最好用分注的方法買入,一要將所有資金,一次過買入,亦不要集中在一隻股票中。(對照龔成信箱Q2097)

問2:成兄,其實我真係好有心想學好投資,但身邊的朋友基本上都係唔識呢啲話題。我覺我自己摸下摸下進度好慢,請問你當年學呢樣嘢的時候,有冇咩方法令自己可以集中同埋進步得快一些?

龔成老師答:
我18歲開始買股票,乜都唔識,所以當時以瘋狂的狀態去學習,不斷睇投資書,每日睇新聞財經,去投資講坐,上課,識投資班導師,去證券行做野(目的都是學嘢),之後開始了一星期睇一份年報的習慣,現時都係。(對照龔成信箱Q2109)

問3:我想問下,你點學投資知識,你之前有無出去學,定純睇書?

龔成老師答:
大約20年前第一次買股,發覺自己乜都唔識,之後開始狂睇投資類書,之後咁多年,平均一星期賺一本,到宜家都係。
同埋出去不斷聽講堂,上投資班,到證券行工作,學野,最初著迷技術分析,因為我數學攞A,好中意睇圖,試過自己用方格紙,用手畫幾百張股價走勢圖。

技術分析都分析了5年,發覺賺唔到錢,同時,開始知道大部分有錢人,投資原來都唔用技術分析,只用基本分析,視買股如買企業。爭扎一段時間,最後決定放棄我放了好多心機學習的技術分析。
之後開始用價值投資法,平均一星期睇一份年報,到宜家都是,投資開始贏多輸少,累積賺到數百萬,算是有一點成績。(對照龔成信箱Q2114)

問4:想問如果新手想開投資戶口,邊間最好?

龔成老師答:
銀行分行較多,較方便,較穩健,證券行較平。其實證券行都很穩健,香港的監管做得不錯,但銀行總會比證券行略穩健。
中銀滙豐渣打都可,但你要留意手續費,同埋種種費用。(對照龔成信箱Q2099)

問5:我見你問答中有提到要睇畢菲特的書,請問係佢本人寫的還係其他人寫但用了畢菲特理論類?
另外,我想問買收息股後,如果股市大跌,咁會唔會蝕晒啲錢?定還是上落不會太大,以收息賺錢為主呢?
我現在每月有$2,000可以用作投資,打算長期的,請問買邊隻股比較好?謝謝你

龔成老師答:
畢菲特無正式寫過書,但就有幫佢自己間公司巴郡寫年報,而出面有書將佢年報集結成書的。
至於坊間的畢菲特書,應該有過百本,都是作者自己理解畢菲特而寫的,但我都覺得,好多都有睇的價值,你試試找幾本睇,你有得著的。《解讀巴菲特》不錯。

股市大跌,可以所有股的股價都跌,但只要你長線投資,並投資優質企業,股價跌完後,就會慢慢上升,次次都是咁的。只要大跌時,你不急著要賣出,不擔心短期股價,不理短期問題,咁就可以了。

如果你想收息,可考慮:合和公路(00737)、香港電訊(06823)、中電(00002)、煤氣(00003)、長建(01038)、陽光房地產基金(00435)、置富(00778)。都是股息不錯的收息股,你可以睇下佢哋10年的股價圖,中間一定有波動,但長期總是上升,同時中間不斷派息。(對照龔成信箱Q2113)

編按:龔成是於公屋長大的80後青年,畢業後於銀行從事投資相關工作,雖然月薪僅萬多元,但因為理財及投資有道,只花五年時間,於28歲已累積到100萬元資產,目前淨流動資產有數百萬元。著有暢銷書《80後百萬富翁》、《80後2百萬富翁》及《財務自由行》,並出任創富課程導師。

facebook專頁:https://www.facebook.com/80shing
個人網站:https://80shing.skx.io/
多謝各位提問,若然你有問題想向本人發問,可在龔成的fb專頁中(www.facebook.com/80shing)inbox龔成,但要注意如無特別聲明,有可能將問答放上網的,當然,會將發問者的身份,以及有關個人的部分刪去。
另外,由於提問人數眾多,見諒無法即日回覆,如果是普通的提問,預起碼要3天以上才能回覆,若然是較複雜的提問,起碼要7天才能回覆,希望各位能諒解。