出嚟社會工作 學識嘅係唔好做自己

「藍橙，你入咗嚟公司幾耐？」

「幾年…」

「雖然日子唔算長，但喺我眼中，你已經唔係一張白紙。」

當時我心諗，係咪讚緊我想加人工呢？點知，前輩再同我講…

「喺我眼中，你係一張廢紙。」

劉青雲講過：「做人無公關？食屎嫁嘛。」

出嚟社會工作，學識嘅就係唔好做自己、最緊要隨波逐流、畀少啲意見、發少啲疑問…

慢慢會被呢個社會磨得平平滑滑，心入面嗰團火？一早就熄咗啦。

我同自己講…藍橙啊藍橙，公司出糧畀你，你就係一隻狗，千祈唔好反抗啊，

如果唔係連份工都無啊～

每晚屋企人都會不停問我幾點收工返黎飲湯。

我心諗…都想知我幾時先收得工啊啊啊啊！

而家成日都會懷念返嗰幾年大學生涯，雖然我又頹又廢又窮，但起碼想做乜就做乜。

畢業出到嚟做嘢，無錯係搵到錢，不過就無晒時間，想做乜都唔得。
正如而家返工好多潛規則一樣，大學都有好多獨特文化。

以前喺Hall三唔識七，一齊喺Pantry食個宵夜已經係朋友。

而家同事表面上就出生入死，實際上總會喺背後插你一刀！好似玩《刺客教條》咁…

望返以前第一次著老西嘅相，以為自己好型。

而家日日著老西返工，我又懷念返喺Hall短褲拖鞋四圍走…

由第一次到第Ｎ次走堂，已經走到麻木晒。

而家？病到死死吓，都唔敢同老闆請半日假。

第一次見工嗰種緊張既心情，係一世都唔會忘記。你永遠理解唔到，點解見工

要用多國語言去介紹自己，仲有一堆連愛因斯坦都無法解釋嘅題目。

「你覺得自己有咩缺點？」

「懶…」

「咁公司點解要請個懶人？」（心底：DLLM咁你又問…）

「點解你想返呢份工？」

「因為覺得好有挑戰性。」（心底：我只係想要錢咋）

「如果做耐咗，無挑戰性你係咪辭職？」

「……」

「點解公司要請張白紙呢？」

「但招聘廣告話無須工作經驗我先嚟見工咋喎…」（心底：你咁嘅人工，請鬼到有經驗嘅人咩？）

我本來以為工作，係用嚟實現夢想…

點知工作只係令我同夢想嘅距離愈來愈來遠。

老闆對我嘅要求愈高，我對自己要求就愈低，有份工，有糧出已經心滿意足…

作者為80後網絡作家，憑【我是技安，我出席了大雄的葬禮】網絡創作爆紅。
facebook專頁：https://www.facebook.com/BlueGodZi/