好朋友計分表 5分鐘即知你哋有幾friend
1 佢知道你最不可告人的秘密
有時要自己一個守住秘密真係好難受，有個死黨同你分擔就好好多.
佢亦係唯一一個知道你中學暗戀過邊個、試過喺邊度屙爆咗個廁所等等等等。
2 講賤野
唔熟你嘅人可能會覺得你好斯文，但喺死黨面前就係勁嘴賤，因為佢唔會介意你把口有幾衰，而係會同你一齊嘴賤。
3 隨時做你樹洞
當你今日返工又畀老闆鬧，做野做到心灰意冷，就會好需要你死黨呢一個樹洞，同你分享負能量。
4 支持你 令你成長
喺你每一個階段都有呢個死黨陪你，你做嘅每一個決定佢都會陪你一齊分析邊個對你最好，仲會無條件支持你，邁向每個新階段。
5 見盡對方素顏、醜態
對住外人總係覺得化咗妝先有自信，但係對住死黨就係無形象.
外表係點都唔重要，你甚至會著睡衣、全素顏同佢落街食個tea，係佢面前幾樣衰都唔會在意。
6 係你專屬嘅救生圈
人生總有失意嘅時候，當你畀公司炒咗，覺得自己一敗塗地嘅時候。
你嘅死黨就會出嚟拉你一把，唔會畀你一個人跌落深淵，仲會畀錢你食飯，做你的救生圈。
7 陪你笑過喊過
最開心就係可以同死黨無憂無慮咁開心笑笑笑，不過當你見到佢畀人蝦，你會比佢更難過，佢喊你比佢喊得更大聲。
8 陪你經歷人生高低
佢唔係對你見高拜、見低踏嘅個啲人，而係當你成功時會為你感到開心，你低落時會係你身邊扶持你、幫你。
9 唔怕得罪對方
你地對住大家係咩都講得出口，因為你知道就算佢呢一刻嬲咗你，下一刻就會原諒你，你對你地之間無堅不摧嘅友誼十分有信心。
10 直腸直肚無隱瞞
對住其他人你會刻意去修飾用字，就算佢著件衫唔好睇，你都會話好有特色呀。
但對住死黨，識咗咁多年，妻係唔會對佢講假話，呢條褲著到佢pat pat好大就直接叫佢換過條。
11 唔會出賣你
死黨就係無論幾時都企係你果邊，無論用幾多錢都買唔到，所以你知道佢一定唔會出賣你。
12 你有需要時一定會出現
無論係咩事，只要你有需要身為你嘅死黨一定會出嚟幫你。
好似你準備創業做老闆，開張之前都係多得佢幫你打點，一齊先會咁順利。
13 失戀總會陪住你
喺你失戀呢個最脆弱嘅時候，總有佢日日夜夜陪係你身邊，唔畀你亂諗、陪你一齊鬧前度係正衰人，祝佢生性病。
14 有好野就開心share
平時試到有咩好食嘅餐廳，你會即刻分享畀你死黨知；有咩護膚品又平又抵用，你會買埋畀佢。
15 Dead air都唔會尷尬
你地唔洗刻意搵話題，就算無野講，你地都唔會覺得尷尬，反而更享受兩人之間嘅寧靜。
16 病咗會鬧你關心你
當你貪靚著得勁少布、係咁食煎炸野食雪糕，然後順理成章咁病到五顏六色。
佢會鬧你仲著咁少衫、要著多件外套、唔准偷食雪糕、要留係屋企休息。
17 知你喜惡
你揀飲擇食者或飲食十分挑剔，佢統統都記得，知你唔鐘意食朱古力、只係食炸蠔、超鐘意食蕃茄、食拉麵要食淋身。
18 少見面但一見面就傾唔停
要返工返學，為生活打拼，見死黨嘅時間都無咁多。
不過只要一見面就會雞啄唔斷，無人可以叫停你地，因為實在太多野想同你分享。
19 友誼唔會因為時空生疏
佢因為去英國升學，所以長居英國，但你地嘅友誼無因為距離而分開。
你會定時定侯去探佢，佢每次返嚟見得最多嘅人就係你。
20 有好笑野即刻send畀你
上Facebook碌一碌，見到個好好笑嘅post，笑到你碌地，你第一時間就會諗起佢，會截圖分享畀佢，分享你嘅快樂。
上述20個考驗，每中一個得1分。
0-5 分 朋友以下
睇嚟你哋都唔係好Friend……
6-10 分 嘗試增進感情
雖然未算係好差，但都要見多啲增進吓感情喇，仲唔快啲約佢食飯？
11-15 分 好朋友！
有佢喺你身邊，真係要感恩！！！
16-20 分 要珍惜呢個朋友！
如果同佢分享咗咁多，呢個真係完美朋友，要好好珍惜佢呀。
