早餐 要食水要食 仲要唔好成日坐 Keep住後生8個方法

青春真可爱青春~

相信每個人都想青春常駐、想年年都keep住25歲! 不過歲月不饒人，人總會老! 尤其是出咗社會做嘢之後老得特別快，筆者深感明白! 筆者睇咗幾篇文章，發現自己容易變老係源自於生活習慣，原來自己老得快都怪自己平時生活無做足…

其實想keep住年年25歲其實都唔係無計嘅~但前提真係要注意平時生活習慣，由起身嗰一刻開始就要留意，唔能夠馬虎，以下係筆者總結咗8個保持青春嘅方法，唔知你又有冇做足呢?

1.唔好一日坐到黑

長時間坐係會令身體新陳代謝放慢。
坐得太耐唔單止會令下半身循環唔好同腰痠背痛，更加容易患糖尿病、心臟病等，甚至有早死危機。相信好多坐辦公室嘅打工仔應該真係由朝坐到晚，又好少做運動。

做還做，有時「吊頸都要唞下氣」! 每個鐘頭都起身行下、去個廁所又好，伸下懶腰都好，總之一定要郁一郁!

2.日日飲足夠水

每日都飲6-8杯水是常識吧!
不過應該好少人真正做到，打工仔有時忙起上嚟連飯都未必夠時間食，所以會成日唔記得要飲水。水係加速新陳代謝不可缺少嘅物質，一方面可以促進消化，仲可以防止便秘。另外，唔應該口渴先飲水，等到口渴先飲一切都太遲了，應該要定時飲水先岩。

3.日日都要食早餐

起床後嘅第一餐係相當重要!
如果朝早唔食早餐唔單止唔可能瘦，反而會導致肥胖。因為朝早攝取唔到足夠嘅熱量同營養，會容易導致午餐同晚餐攝取過多能量，如果食高熱量食物的話，身體會吸收更多熱量。久之久之會出現肥胖、三高(高血壓、高血脂、高血糖)等問題，咁樣想青春都難呢!

4.食早餐前飲杯暖水

金句王黎明曾經講過:「唔會空肚食早餐」。呢個絕對正確!
除左每日都要食早餐之外，食早餐之前應該養成先飲杯暖水嘅小習慣，因為早上飲暖水有助身體新陳代謝並幫助身體正常運作。

5.要有足夠睡眠

一個人唔夠訓會好快老!
長期睡眠不足，工作效率不但會好差，臉色仲會好難睇，甚至有猝死機會。因為身體無足夠時間去休息，更加無足夠時間去修復身體。所以每人都應該有6-7小時睡眠時間，令身體一直處於健康嘅狀態。可惜香港打工仔OT無極限，想訓到6個鐘真係好有難度! (筆者都想有多幾年命~)

6.得閒曬下太陽

相信好多人都怕曬太陽，特別係一眾愛美嘅女士!

不過陽光可以促進鈣吸收，對骨骼健康有好處。當然，長期暴曬的確會對皮膚有傷害，所以唔使多! 得閒曬下10-15分鐘太陽就夠晒數啦! 筆者由朝早到放工都留喺office，睇嚟我都要多曬曬太陽先得啦!

7.多做運動

多做運動唔單止可以促進健康，仲可以抗衰老!
其實想延緩皮膚衰老，除左靠平時敷Mask之外，做運動都好重要。因為做運動一般都會出汗，出汗可以促進人體新陳代謝，同埋加快血液循環。所以平日步行半個鐘至一小時，甚至行下樓梯代替搭電梯對健康同保持青春都有一定幫助。

8.攝取適量咖啡因

咖啡除咗可以提神，更加可以抗衰老。

其實咖啡入面嘅咖啡因有助促進新陳代謝。另外，美國一項研究指出咖啡因可以有效抑制炎症分子。適量飲有咖啡因嘅飲品可以降低患心血管疾病，同埋患老人癡呆症嘅風險。