唔想做快啲辭職 坐得呢個位就俾心機

我好鬼鍾意去茶記，因為貪佢地方細細，又可以搭枱，方便偷聽唔同人嘅對話。偷偷哋話比大家知，其實我有一項技能，就係聽人對話內容，可以估到佢哋職業，唔信？咁啱有三條女坐我隔離，試比你睇下～

三條女清一色偽ABC OL打扮，aka摟吊裙。

A女：「我真係頂唔順班IT人，今日嗰個，一叫佢介紹自己，佢就即刻話「我識XXX、BXX、FXX…ABCDE！」」

B女：「啊哈哈哈，佢哋係咁㗎！剩係識講啲system名，完全唔知佢講咩！」

A女：「所以我想轉去做Bank Sales嗰邊，好似搵得多啲！」

C女：「佢哋嗰邊好難入㗎喎！同埋啲Sell屎好串！」

A女：「係啊，所以佢哋咪要話「我識得阿邊個邊個，之前邊個邊個大粒又係我refer嘅！」要做耐咗，先可以拋返佢哋轉頭。」

B女：「嗯，我做咗幾個月，覺得好似仲未係好掌握到啲candidate。」

A女：「你當佢哋係你條仔咁，食住佢哋咪得囉！」

然後三條女一齊「哈哈哈哈哈哈哈哈」。

我一邊食住我嘅焗豬，一邊聽到滴晒汗，原來唔單止我呃飯食，Headhunt界都有唔少呃飯食之流。

人哋IT人咁認真講自己profile，你唔識，即係唔夠專業，仲好意思笑人？

想做Sales人生意，以為識name-dropping拋人就掂？

其實，做得Recruiter，已經係一個Sales，唔該攞返少少專業水準出嚟。我遇過好多為求盡快將你塞入一個空缺嘅Recruiter，而漠視你嘅條件同需要，亂做mapping。

或者我食檸檬食上癮，我最欣賞嘅，就係一個派檸檬我食嘅Recruiter，佢叫阿V。佢同我傾完一輪，唔會hard sell我去一個我唔願意做嘅field，而我未能符合條件嘅post，佢亦都唔會隨便refer。

「我諗呢一刻我無嘢比到你。」呢個係同佢傾完一輪嘅結論，佢唔需要食住我，我都無需要串佢。彼此互相尊重，尊重對方嘅專業。

難做Sales人生意，係因為佢哋好了解你背後嘅動機，唔好忘記，佢哋自己同樣靠佣搵食。係咪亂咁sell？係咪有心幫個candidate？Sales人一定會知。

Recruiter成功介紹一個candidate會袋大約廿%佣，從好嘅方面諗，佢有佣賺，我有份新工，大家創造雙贏。呢樣同我哋平時sell嘢好似，我有佣袋，個客做到投資，有機會賺到錢。但認真一諗，個客尚且有risk disclosure，知道投資緊嘅嘢有無風險，同埋個後果係點啊。之但係份新工呢？萬一係火炕咁點算啊？！我可唔可以告個Recruiter mis-selling啊？！

作為一個有良心嘅Sales，我衷心希望Recruiter可以知道自己sell緊啲咩，你哋唔單止係sell緊一份工，而係人哋嘅前途啊！

文章授權：90後銀行小妹甩轆記