邊個再講以前啲人都係咁做 你就帶定鉸剪同布條

唔少科學家都相信，我哋人類只使用咗10%大腦，於是我一直喺到諗，人類學習能力極強，應該好快就可以開發埋餘下嘅90%！直到我踏入職場，我先知道，原來10%已經係極限。

初入職場果陣，作為新丁嘅你一定試過跟住公司啲前輩學嘢！你好認真，甚至用紙筆記底重點，但到最後你發覺呢啲嘢全部都係「千里送鵝毛」，即係點？你幻想下你姨媽由柴灣出天水圍送條毛俾你，你會唔會覺得「禮輕情義重」啊？你直頭唔知佢做緊咩啦！

職場上原來「千里送鵝毛」喺好常見嘅事嚟！今日我見到其他部門主管同我哋前輩要人。
「呢排唔夠人，可唔可以調Mary過嚟幫我哋手？」

「咁我哋咪唔夠人！」
「唔洗驚，xx部會調Peter俾你。」
「咁好啦，Mary就交俾你！」
我喺隔離聽到一頭霧水，點解唔直接俾Peter佢哋？我催眠自己可能Mary比較優秀，但喺咁依家咪變成xx部門唔夠人手囉，加上Peter又唔喺熟手，過嚟又幫到啲咩！
你諗極都諗唔明，終於鼓起勇氣問前輩「咁xx部係咪會唔夠人？」
前輩秒速開口「係啊，有乜計！呢度以前啲人都係咁借人。」

不過當時作為新人，求知慾比較旺盛，一遇上諗唔通嘅事就會滿腔熱誠咁去問「點解嘅？」
但一次又一次，我都只係收到：「之前啲人都係咁做，無點解。」

原來大家都放棄咗開發自己大腦，唔合理或者愚蠢嘅方法，只會一直沿用落去，如果你嘅主管、前輩都係呢種人，建議你下次同佢討論問題之前請帶上一把鉸剪同埋布條。

當佢再回你「以前啲人都係咁做」。
如果對方喺男性，你可以露出鋒利嘅鉸剪試著說：「以前係皇上身邊嘅公公都會閹割，洗唔洗我幫你？」

如果對方係女性，你可以蹲下身子除鬼咗佢對高踭鞋：「聽講以前女人細腳就係靚，所以會裹腳，你要唔要試吓？」