打銀行工唔容易 向銀行職員表示敬意

職場

廣告

小弟喺銀行做嘢,而喺好多港人眼中,做銀行=賺大錢嘅銀行大班,輕輕鬆鬆又一日。但其實喺香港,「銀行」呢兩個字好似有更多潛意義,而「分行」其實主業係分,副業係行,全名叫「分配免費資源及諮詢中心暨銀行」,眼見sales們喺網上大呻辛酸,身為銀行小薯仔嘅我,都好想分享一下。

 

自從香港愈嚟愈多打扮別樹一格嘅後生仔披套西裝去做地產代理,又一堆隨之而生嘅西裝友打爛仔交等新聞浮現,令要著西裝返工嘅後生仔從以前畀人叫「西裝友」,變成依家仲多咗個百家姓上無嘅姓氏-「死」,或者有啲文學根底嘅,就叫我哋「衣冠禽獸」。

 

萬惡的免費Wi-Fi

小弟做嘢嘅分行有提供free wifi畀我哋嘅客戶,如果閣下做過有提供免費wifi嘅餐廳或者咖啡室都知道,尊貴嘅客戶係會將連唔到free wifi嘅責任同不滿發洩喺職員身上。

 

有次有位純粹想幫襯我哋個free wifi嘅尊貴「客戶」,因為連唔到wifi而由銀行外面直接衝入我間房,一嚟就破口大鬧:「密碼呢!?」

 

「小姐你冷靜啲先,我哋個free wifi係無密碼嘅。」

 

「咁點解我連唔到吖!?」

 

我望一望部手機,明明爆哂架喎。

 

「小姐,我哋個wifi係所有人共享嘅,可能會比較慢。」

 

「咁_廢就咪鬼整啦!嘥我時間!你班垃圾!」

 

嗯。

 

全方位Information Desk

所有從事服務性行業嘅朋友都應該試過被客問路,通常啲客都會當你係嗰一間商場、地區、甚至香港嘅Information desk,仲要有埋google嘅導航系統喺個腦度,近嘅你就要識講點行,遠嘅你連點轉巴士都要答到佢,而且仲要準確無誤,否則投訴你。

 

小弟喺南區返工,但有次就畀人問我去到落馬洲點去深圳北,真係一啲概念都無,唯有chok個虛偽而服務至誠嘅笑容:「唔好意思,我唔太清楚」

 

畀人黑臉都係意料中事架喇,喺我以為佢黑完個臉會走之際,但我勢估唔到佢竟然手指指鬧:「唔知咪去check囉!斯文敗類!」

 

斯文敗類?斯文敗類??斯文敗類???斯文敗類????????????????

 

職員資源要同所有人分享

有一次有個大媽入嚟同我哋同事講:「畀杯水唔該。」

 

我當堂呆一呆,我係咪聽錯呢?我係咪聽錯呢??我係咪聽錯呢???(很重要所以講三次)

 

呢度點睇都唔似茶記掛?

 

大媽見我一臉迷惘,又話:「禾要杯水呀!里聽五聽得綿趕冬畫呀?」

 

我唯有同佢講:「小姐,呢度無水提供,出面轉彎有便利店,你可以喺嗰度買到水。」

 

大媽就話:「矛水咁乃哋啲員工唔洗飲架咩!禾巧口渴!」

 

係,我哋員工都要飲,但係唔代表要畀你飲姐…… 你又唔係有咩頭暈身慶,你口渴咋喎!

 

重點係呢度又唔係餐廳!更何況喺餐廳你都要幫襯先可以拎杯免費水啦!係咪咁講先!