【生活趣談】一齊嘴賤 做你樹洞 好朋友先會做的20件事

【生活趣談】一齊嘴賤 做你樹洞 好朋友先會做的20件事

生活趣談】朋友比戀人更高分,死黨更加唔洗講。何謂死黨?就睇下佢符唔符合以下20項死黨會做嘅事。

撰文:Smart ED編輯部|圖片:unsplash

1 佢知道你最不可告人的秘密

有時要自己一個守住秘密真係好難受,有個死黨同你分擔就好好多,佢亦係唯一一個知道你中學暗戀過邊個、試過喺邊度屙爆咗個廁所等等等等。

2 講賤野

唔熟你嘅人可能會覺得你好斯文,但喺死黨面前就係勁嘴賤,因為佢唔會介意你把口有幾衰,而係會同你一齊嘴賤。

 生活趣談 朋友 友誼 尷尬 出賣 救生圈 隱瞞 樹洞 秘密
唔熟你嘅人可能會覺得你好斯文,但喺死黨面前就係勁嘴賤。圖片:unsplash

3 隨時做你樹洞

當你今日返工又畀老闆鬧,做野做到心灰意冷,就會好需要你死黨呢一個樹洞,同你分享負能量。

4 支持你 令你成長

喺你每一個階段都有呢個死黨陪你,你做嘅每一個決定佢都會陪你一齊分析邊個對你最好,仲會無條件支持你,邁向每個新階段。

 生活趣談 朋友 友誼 尷尬 出賣 救生圈 隱瞞 樹洞 秘密
死黨會無條件支持你,邁向每個新階段。圖片:unsplash

5 見盡對方素顏、醜態

對住外人總係覺得化咗妝先有自信,但係對住死黨就係無形象,外表係點都唔重要,你甚至會著睡衣、全素顏同佢落街食個tea,係佢面前幾樣衰都唔會在意。

6 係你專屬嘅救生圈

人生總有失意嘅時候,當你畀公司炒咗,覺得自己一敗塗地嘅時候,你嘅死黨就會出嚟拉你一把,唔會畀你一個人跌落深淵,仲會畀錢你食飯,做你的救生圈。

 生活趣談 朋友 友誼 尷尬 出賣 救生圈 隱瞞 樹洞 秘密
對住死黨就係無形象,外表係點都唔重要,你甚至會著睡衣。圖片:unsplash

7 陪你笑過喊過

最開心就係可以同死黨無憂無慮咁開心笑笑笑,不過當你見到佢畀人蝦,你會比佢更難過,佢喊你比佢喊得更大聲。

8 陪你經歷人生高低

佢唔係對你見高拜、見低踏嘅個啲人,而係當你成功時會為你感到開心,你低落時會係你身邊扶持你、幫你。

9 唔怕得罪對方

你地對住大家係咩都講得出口,因為你知道就算佢呢一刻嬲咗你,下一刻就會原諒你,你對你地之間無堅不摧嘅友誼十分有信心。

10 直腸直肚無隱瞞

對住其他人你會刻意去修飾用字,就算佢著件衫唔好睇,你都會話好有特色呀。但對住死黨,識咗咁多年,妻係唔會對佢講假話,呢條褲著到佢pat pat好大就直接叫佢換過條。

 生活趣談 朋友 友誼 尷尬 出賣 救生圈 隱瞞 樹洞 秘密
對住死黨,識咗咁多年,係唔會對佢講假話。圖片:unsplash

11 唔會出賣你

死黨就係無論幾時都企係你果邊,無論用幾多錢都買唔到,所以你知道佢一定唔會出賣你。

12 你有需要時一定會出現

無論係咩事,只要你有需要身為你嘅死黨一定會出嚟幫你。好似你準備創業做老闆,開張之前都係多得佢幫你打點,一齊先會咁順利。

 生活趣談 朋友 友誼 尷尬 出賣 救生圈 隱瞞 樹洞 秘密
只要你有需要身為你嘅死黨一定會出嚟幫你。圖片:unsplash

13 失戀總會陪住你

喺你失戀呢個最脆弱嘅時候,總有佢日日夜夜陪係你身邊,唔畀你亂諗、陪你一齊鬧前度係正衰人,祝佢生性病。

14 有好野就開心share

平時試到有咩好食嘅餐廳,你會即刻分享畀你死黨知;有咩護膚品又平又抵用,你會買埋畀佢。

 生活趣談 朋友 友誼 尷尬 出賣 救生圈 隱瞞 樹洞 秘密
喺你失戀呢個最脆弱嘅時候,總有佢日日夜夜陪係你身邊。圖片:unsplash

15 Dead air都唔會尷尬

你地唔洗刻意搵話題,就算無野講,你地都唔會覺得尷尬,反而更享受兩人之間嘅寧靜。

16 病咗會鬧你關心你

當你貪靚著得勁少布、係咁食煎炸野食雪糕,然後順理成章咁病到五顏六色,佢會鬧你仲著咁少衫、要著多件外套、唔准偷食雪糕、要留係屋企休息。

 生活趣談 朋友 友誼 尷尬 出賣 救生圈 隱瞞 樹洞 秘密
你地唔洗刻意搵話題,就算無野講,你地都唔會覺得尷尬。圖片:unsplash

17 知你喜惡

你揀飲擇食者或飲食十分挑剔,佢統統都記得,知你唔鐘意食朱古力、只係食炸蠔、超鐘意食蕃茄、食拉麵要食淋身。

18 少見面但一見面就傾唔停

要返工返學,為生活打拼,見死黨嘅時間都無咁多。不過只要一見面就會雞啄唔斷,無人可以叫停你地,因為實在太多野想同你分享。

 生活趣談 朋友 友誼 尷尬 出賣 救生圈 隱瞞 樹洞 秘密
只要一見面就會雞啄唔斷,無人可以叫停你地。圖片:unsplash

19 友誼唔會因為時空生疏

佢因為去英國升學,所以長居英國,但你地嘅友誼無因為距離而分開,你會定時定侯去探佢,佢每次返嚟見得最多嘅人就係你。

20 有好笑野即刻send畀你

上Facebook碌一碌,見到個好好笑嘅post,笑到你碌地,你第一時間就會諗起佢,會截圖分享畀佢,分享你嘅快樂。

 

The user will never see this