診所職場事 寶豬趣聞 姨姨的草下集
佢望望醫生棵樹，再同我講：「我抑鬱呀」
我：「……」
佢：「而家係我嘅問題啦」
我：「……」
佢：「肯換俾我未呀？」
我哭笑不得：「真係唔好意思呀小姐，你唔好咁啦，盆嘢唔係我嘅，唔係我話俾就俾到你呀，醫生由細睇到佢大㗎」
佢：「我呢盆夠細啦，再睇唔得咩？你唔換我抑鬱俾你睇呀」
抑鬱係由心而發嘅，吓吓俾你拎出嚟講就係抑鬱啦喎？
我：「不如咁啦，我同你登記睇醫生啦好冇呀？」
佢：「點解要我睇醫生呀？」
我：「你抑鬱呀嘛…要睇醫生㗎」
佢：「我嘅抑鬱唔駛睇醫生唔食藥！」
我：「邊有得咁㗎～」
佢：「一日至衰都係你哋，我老公嚟睇親醫生就喺度話棵金錢樹靚呀好風好水呀！我種呢，就冇風冇水，日日鬧我搞到盆嘢咁，俾咗個題日日自由發揮呀！日日都借啲意鬧我，又話係人嘅問題，又話係樣嘅問題！你換你嗰盆嚟呀！再咁鬧落去，我真係抑鬱㗎！」
對於閣下嘅遭遇，我真係深表同情…
醫生聽到我哋喺度爭論，行咗出嚟望吓咩事～
姨姨見到醫生，就同佢講：「你出嚟啱啦，哎，話事人嚟就啱啦，你換你嗰盆俾我呀醫生」
醫生望望我。
醫生：「哦～話事人唔係我喎」
姨姨：「咁係邊個呀？」
醫生：「我太太啦，要唔要幫你電話俾佢，不過你自己同佢講喎？」
姨姨：「吓，你老婆呀….」
姨姨拎返盆草轉身離開診所前，我聽到佢好細聲講咗句『好惡啃㗎喎…」
睇嚟老闆娘喺診所內外都好名鎮江湖啊。
如果錯過了上集，不妨馬上重溫。
《診所職場事 寶豬趣聞 姨姨的草上集》
有日，一位姨姨拎住好大袋嘢入嚟診所。
佢行埋嚟登記處嗌我：「阿妹呀？」
我：「係～睇醫生係咪？俾身分證我登記先呀」
佢喺袋嘢入面撈埋個盆栽出嚟，擺喺枱面…
人哋送花，你送草俾我呀？仲要凋謝晒喎～算點先～
我：「做咩呢？」
佢：「我想換個盤呀」
小姐，你有冇睇錯呀？呢度診所嚟喎，唔係花店喎～
我：「吓？」
佢指住盆草：「換過盆呀」
我：「呢度睇醫生㗎喎？」
佢：「我知呀」
我：「咁點換盆草俾你呀？」
佢：「草你個頭呀！金錢樹嚟㗎！」
I am sorry，佢中咗面目全非拳，我認佢唔到呀陰公～
我：「但係我哋診所嚟，唔換樹㗎喎～」
佢：「我見到你有㗎」
我：「我哋都冇得賣，又點會有得換？」
佢指向候診大堂內嘅一排櫈：「你有呀！嗰盆咪係囉！」
嗰棵私伙嘢嚟㗎，聽聞由開舖跟醫生跟到而家㗎啦～
我：「呢棵係診所㗎，唔送唔換唔賣啊～」
佢再指向櫈上嘅一面橫匾：「仁心仁術呀？」
我：「其他醫生送俾我哋醫生嘅」
佢『嘖』一聲，撩吓盆草，同我講：「少少嘢都唔幫吓啲街坊街里」
我：「俾心機種啦，他朝有日你嗰盆都會好似醫生呢盆咁嘅」
佢：「你呢度日日曬燈梗係好㗎」
我：「都要心機嘅都要打理嘅」
佢：「你係咪唔換俾我咁冇人性呀？」
哇，出到人性呢樣嘢啦嘛？我而家覺得你係勒索我喎～
寶豬的趣聞﹐還有精彩的的以下這四篇。
《診所職場事 寶豬趣聞 蟲蟲上集》
一朝早又要聽留言。
你有三個新訊息。
早上3:12：「喂？診所呀？我而家有條蟲喺度呀，我阿媽話係蟲，佢唔上唔落呀，可唔可以而家過嚟呀我？」
邊個佢？你阿媽唔上唔落，定係條蟲唔上唔落？夜媽媽你哋兩個做咩玩蟲呀…
早上3:20：「喂？我哋喺門口呀，開門呀唔該，佢仲喺我度呀」
早上3:32：「我哋等咗十幾分鐘啦，你係咪唔開門呀？我阿媽拎咗佢出嚟啦，擺低佢喺門口㗎啦，你俾醫生睇吓我駛唔駛食杜蟲花塔呀？你晏啲有藥攞嘅打返俾我呀，我電話係9XXXXXXX。你記得覆我呀」
….門口….門口有啲咩呀？
我同同事講：「有人打嚟話放低咗啲嘢喺門口…」
同事：「咩嘢嚟㗎？」
我：「如果我冇理解錯嘅，有可能係屎…或者蟲」
同事：「我未食早餐呀，不如你去呀」
我：「我食緊早餐…」
同事：「唔好啦～我驚呀，你聽㗎嘛，你去呀」
我戰戰兢兢行出門口環望四周。冇膠袋冇樽仔，咩都冇喎，唔通清潔姐姐搞掂咗？
正當我準備推門返入診所，我見到…門下邊角位…
有
條
芽
菜
！
我踎低望，喂～應該真係芽菜嚟喎，仲係唔新鮮嘅。
我返入去同同事講：「出面得條芽菜咋」
同事笑到痴咗：「哈哈哈哈哈哈哈哈哈，你講笑咋嘛？」
我：「唔信嘅你出去睇吓啦」
同事行出去望完，已經再講唔到嘢，淨係識喺度『哈哈哈哈哈哈哈哈哈』
我：「咁駛唔駛打返俾佢呀？」
同事：「哈哈哈哈哈哈哈哈哈，打返俾佢同佢講放低嘅嘢變咗條芽菜呀？」
我：「一係等佢晏啲自己再打嚟啦～」
結果，佢冇再打過嚟。不過嚟咗睇醫生…再續。
《診所職場事 寶豬趣聞 蟲蟲下集》
上回講到診所門外出現咗一條懷疑被棄嘅神秘芽菜。
疑似芽菜主人喺當日冇再打過電話嚟問關於蟲嘅嘢，佢選擇咗直接嚟診所。
佢一嚟到診所就行埋嚟登記處問：「姑娘？你收唔收到我嘅嘢呀？」
我：「你寄過啲咩過嚟呀？」
佢：「咩嘢寄呀～我噚晚親自擺喺門口㗎！」
我：「哦～打嚟留言嗰位～」
佢：「係呀，我等咗你成日你都冇覆我嘅，醫生有冇講啲咩呀？」
我：「啊～因為呢～我哋今日返嚟嗰時唔見門口有嘢啊，你放咗啲咩喺門口呀？」
佢：「我放咗喺門口喎」
佢行出門口望再入返嚟。
佢：「門口冇咗啦喎，你係咪攞咗唔出聲呀？」
係咪芽菜呀？係咪芽菜呀？係咪芽菜呀？我好想就咁問呀！
我：「冇呀，我哋今日一返嚟已經冇嘢喺門口，你拎咩裝住㗎？」
佢：「臨時臨急…冇嘢裝呀，我就咁擺咗佢喺度咋」
我：「唔好意思呀，唔好介意呀，我想問『佢』即係咩呀？」
佢：「蟲囉！」
係咪芽菜呀？係咪芽菜呀？係咪芽菜呀？我好想就咁問呀！
我：「條蟲你記唔記得係咩樣呀？」
佢：「蟲有樣㗎咩？」
啊，係喎，俾你發現咗我係低能添。
我：「係咪手指尾咁長？白白哋咁呀？」
佢：「係呀！你係咪攞咗呀？」
我：「我今朝呢…或者我轉咗方法問你呀～你呢幾日有冇食過芽菜呀？」
佢諗咗陣。
再諗咗陣：「譚仔係咪有芽菜？」
我：「係呀～」
佢：「咁有呀，做咩呀？」
我：「我今朝呢…就見到有條芽菜喺門口嘅，唔知係咪你所講嗰條蟲呢」
我已經聽到隔離藥房個同事喺度笑。
佢：「…..芽菜會成條出返嚟嘅咩？」
我：「你冇咀嚼過嘅話，係有機會嘅」
佢頭也不回離開診所。
我同事：「你正衰人嚟㗎！做咩話俾佢知係芽菜呀？你咪照當係蟲咁俾醫生睇囉！」
指芽為蟲呀？
《公主出巡》
風和日麗的早上，幾位青春靚女各人都拖住一個喼嚟到診所。
行頭位嘅A小姐熟練咁放低身份證俾我：「登記呀」
A小姐立即擰轉頭同其他朋友講：「身份證呀，拎出嚟啦」
BCD立即拎出身份證擺低晒俾我。
登記後，我：「可以袋返好啲身份證㗎啦，咁醫生就未返嘅，你哋預15分鐘後返啦，你哋排第十六十七十八十九個啊～」
A望望鐘，同其他友人講：「冇問題呀，仲夠時間」
十分鐘後，一開門就登記咗嘅人陸續返到嚟診所。
A望望啲人，再望望我。
A行埋嚟登記處問我：「呢啲人係睇醫生㗎？」
我話路過參觀你信唔信？
我：「係呀，你哋排第十六嘛～」
A：「頭先冇咁多人㗎喎？你俾佢哋打尖呀？」
我：「唔係呀，佢哋登記咗就行咗出去咋，我有同你講排十六啊～」
A：「我都聽唔到！咁而家我哋點呀？」
我：「如果你哋要睇都要照排隊啊」
A:「等幾耐呀？我哋要搭飛機呀」
我：「你幾點機呀？」
Ａ:「11點半呀」
我：「而家10點啦喎？最遲50分鐘前Check in，都要十點八去到呀？呢度入機場都要時間呀～」
其實你而家可以起行㗎啦。
A：「係呀，所以你醒目嘅就快手啲啦」
BCD行埋嚟問：「咩事呀？」
A ：「冇事！個死蠢俾好多人打咗我哋尖，不過放心！我會拆得掂！你哋坐陣！」
我：「唔好意思呀小姐，我頭先已經同你哋講咗排第十六個，我絕對唔會俾人打尖～」
A ：「我前面咁多人喺度，唔係打尖係咩呀？」
啊！企喺你前面嘅就個個都係打你尖，原來係咁理解嘅。
我：「佢哋個個都登記晒～你喺度嘈都冇用，如果你係想拎平安藥嘅，我可以幫你配咗先」
A：「我哋個個都要3日假紙呀！藥就唔需要囉！」
我：「假紙呢層就…你哋要等見醫生啦！」
A：「死蠢！你係咪聽唔明我哋有幾急呀？你浪費緊本公主嘅時間呀！」
公主呀？包機啦咁～
我：「真係唔好意思，我哋係絕對唔會俾人打尖，而且假紙唔係你話要幾多日就幾多日～」
B又行埋嚟問：「點呀？我哋要起程㗎啦，如果唔係趕唔到喎」
A同B講：「呢個死蠢弱智㗎！唔怕！我哋玩完返嚟再攞假紙！我實搞得掂！」
佢哋一行幾人又拖坐個喼離開診所，A仲醒咗個中指手勢俾我：「你繼續喺度打工啦！」
玩得開心啲啊～
返到嚟，你應該可以唔駛打工，真係令人羨慕啊～
《亂收費》
電話響起～
我：「你好，乜乜診所」
佢：「診所呀？你哋星期日開唔開㗎？」
我：「開啊，應診時間係10-7」
佢：「星期日都開，醫生好發錢寒㗎？」
你想我點答你？
我：「….」
佢：「你哋會唔會亂收費㗎？」
我：「唔會呀，就算要開特效藥要加錢都會講咗俾你知先。」
佢：「即係會亂收費啦」
吓？講明俾你知都叫亂收㗎？
我：「你可以選擇唔要嘅～我哋唔會迫你要特效藥」
佢：「我有得揀咩」
我：「可以唔要…」
佢：「咪係囉！咪即係迫我要囉！」
媽，我好亂呀。
我：「……」
佢：「你一個收費包晒唔得㗎咩？」
我：「如果包晒嘅話，個價就會高咗～咁有時有啲人未必需要特效藥嘛」
佢：「拉上補下囉，你咁亂收費，係人都知你發錢寒啦」
我：「好多謝小姐你嘅意見，我會話聲俾醫生知以作參考㗎啦」
佢：「你mark低我個名呀」
我：「咩事呢？」
佢：「我星期日會過嚟睇」
我：「我哋冇預約嘅，嚟到登記排隊就得㗎啦」
佢：「你真係好唔掂呀，呢樣又唔得嗰樣又唔得咁樣又唔得」
我：「….規矩嚟嘅」
佢：「By the way我要星期日過嚟睇，你平時收人幾多錢呢part我就唔理啦，你收我平啲就得㗎啦，我星期日過嚟，我唔係啲咩閒人，冇咁多時間同你講同你等，你明㗎啦，我叫乜乜乜，嗌我乜小姐is fine」
