診所職場事 寶豬趣聞 特別服務 下集
佢：「診所呀嗎？」
我：「係呀～」
佢：「你哋有咩服務呀？」
醫生，你可以提供到啲咩服務呀？我淨係答佢『診症』嘅話，好似唔夠勁揪啊～
點算好點算好！我係一個好員工！
我：「我哋嘅醫生會睇傷風感冒咳肚屙便秘周身骨痛等等，會開藥啦，會轉介啦，會了解你需要幫你揀適合你嘅身體檢查～」
佢：「哦…」
我咁落力…居然只換嚟一個字『哦』，我好傷心。
我報仇：「嗯」
佢：「哦…仲有冇其他呀？」
我：「或者先生有啲咩需要呢？可以講出嚟睇吓我哋有冇呀？」
佢：「特別嘅小手術呢？」
點特別法呀？人哋整雙眼皮，你想整十眼皮呀？人哋想整高個鼻，你想割埋個鼻，佛地魔咁？好出眾喎～
我：「不如講清楚係邊啲小手術呀？我哋都有雞眼，粉瘤呢類嘅小手術嘅～」
佢用氣音講咗啲嘢，我：「唔好意思，我聽唔到，可唔可以講多次啊？」
佢：「忍術」
搵忍者亂太郎新丁啦，新丁～有人搵你呀。手術同忍術兩樣嘢嚟喎…
我：「….先生，我哋診所嚟，冇忍術學」
佢：「我講嗰度嘅忍…」
遲鈍的我：「邊度呀？」
佢：「姑娘，你係咪性騷擾我呀？」
我幾時性騷擾你呀？你過度幻想呀？
我：「我冇呀，我問你邊度咋？」
佢：「梗係我嗰度啦」
哦！你想講性能力呀嘛？隔住個電話唔駛怕醜啊～我又唔知你係邊個。
下回續
上回講到電話裡的男人想學忍術，咩嘢忍術？性能力忍功呀～
我：「關於呢方面，你需要睇醫生，等醫生了解咗先，之後可能會轉介你去專科啊」
佢：「唔係有啲小手術可以做㗎咩？」
我：「我哋診所冇呢方面嘅手術可以做啊～要由醫生轉介你去專科嘅」
佢：「你同我問咗醫生先啦，開得診所做得醫生嘅唔係一嚟就話冇啦，專科要約㗎嘛？我趕住聽日用㗎，做到就今日做啦」
今日做聽日用，抖唔夠廿四小時就要出動…你都真係好急住用喎。
我：「我哋冇做呢科嘅手術啊，割包皮都冇呀」
佢：「你都未問醫生！你係醫生咩？你係邊個呀？」
我係清潔大嬸啊～
我：「我可以幫你問問醫生嘅，不過醫生而家睇緊症，你方便嘅留個電話俾我，我轉頭打返俾你呀～」
佢：「我等你！」
我：「請問電話號碼係？」
佢：「我喺度等你呀！」
我：「但係我哋診所電話得一條線，唔方便HOLD太耐呀～我轉頭問完醫生打俾你啦」
佢：「你搞掂完我先理其他外人啦！」
外人？我同你都好外吓喎，冇FRIEND過呀！
我：「咁…你慢慢等啦，醫生睇緊症。」
一HOLD就HOLD咗十分鐘。
我行入醫生房問：「醫生呀，有位先生問你有冇做醫早洩嘅手術？」
醫生望住我：「寶豬，你喺度都做咗一排，連診所有咩手術做都唔知？」
我：「先生堅持要我問，我先問吓，冇嘢啦～唔該醫生」
醫生：「個個都要問嘅，我一日要用幾多時間答你呢啲無謂問題，你有冇腦？你個腦可唔可以自己處理問題？」
我：「唔該醫生，我出返去啦」
醫生：「唉，下次唔好再問埋啲無謂嘢好冇？」
我：「係～」
醫生今朝喺屋企早餐食屎啊～心情唔多好呢～陰公。
我拎起電話：「喂？先生？仲喺度嗎？」
佢：「係！」
我：「醫生話冇呀～如果你有需要嘅，都係轉介你啦」
佢：「咩嘢冇呀？我條路生得比人短，你同我駁長條路咪得囉！打幾個蛇餅等佢遊吓花園唔得咩？」
你呢個諗法又幾有趣幾創新，我都幾鍾意。
我：「冇呀，我哋冇得做呢啲」
佢：「我應承咗女朋友聽日俾驚喜佢㗎！」
唏～又早咗添，驚唔驚喜唔喜？
我：「唔好意思呀，先生。我哋醫生真係幫你唔到～」
