買樓靠母幹 我個仔U Grad人工$12,000 唔幫佢俾首期個心唔安樂 | 網民熱話

後生仔買唔到樓

後生仔覺得前景不明，中年人更加係百事哀，以為嗰啲退咗休印印腳唔洗做之士會安樂啲啦，點知都係好多問題困擾。
一把年紀，退休前打開收入唔錯的工，樓又一早供滿，本身儲落啲本錢，再加埋兩公婆份退休金，理應唔洗點擔心至係。點知原來又係你睇我好我睇我好。
早兩日約咗個Uncle朋友飲茶，佢就呻到樹葉都落。原來係為咗個寶貝仔。

人工$12,000 難買樓

佢個囝囝其實幾生性幾聽話，好純品又勤力，大學畢業無耐，而家喺一間小學做TA，人工大約 $12,000。
Uncle個仔讀U時識咗個女仔，大家係同學，個女仔都好純品好斯文，拍咗幾年拖，雙方家長又見過，後生仔女諗將來，好自然就諗到結婚。
據聞個女仔讀完書去咗啲NGO度做，話想做啲幫人嘅工作，人工當然係唔太高啦，都係萬鬆蚊一個月。

個女仔父母都係出身基層，對落仲有兩個細佬妹，佢哋唔係話要求高，亦都唔係啲咩貪心之人，只係望個女嫁得好但求生活平平淡淡就好。
Uncle諗到都要為個仔打算一吓，但佢人工得個萬零蚊，放工之餘仲要讀書進修，平日返工拍拖洗費，已經冇咗一大截，真係佢每月俾少少家用，自己都唔好意思要。
佢哋一家住北角幾十年舊樓，想話同區幫個仔搵個細單位，舊到冇朋友嗰啲，起碼700萬無走雞。

最後，Uncle幫個仔睇中咗將軍澳啲十零年嘅大型樓盤細單位，買樓嘅入場費600萬，計佢俾四成首期，都要去$240萬，如果供足25年，每月都要供 $15,000有多。
兩個後生加埋人工都係兩皮多少少，都過唔到銀行壓力測試。當俾佢過到，真係唔洗食咩？Uncle諗到呢度，真正心都疼埋。
大家都明白，後生仔世界，佢哋將來應該由佢哋自己創建，但睇住個仔日捱夜捱，佢最終做咗個決定，就係同老伴傾盡家財，一炮過600萬買樓。

但求阿仔每月俾返4、5 千蚊佢哋洗吓，當佢慢慢同自己供樓囉。
做人嘅嘢，決定在自己，係就係大拿拿幾百萬㗎喇，真正係老本中之老本，但係如果唔幫個仔，Uncle話個心會唔安樂。