診所職場事 寶豬趣聞 想去急症的小姐
廣告
有位小姐氣都喘埋嚟到診所。
佢跑埋嚟登記處：「姑娘姑娘！點算呀？」
我：「做咩事啊？你慢慢講，要唔要抖順條氣先？」
佢：「我係咪要去急症呀？」
但係呢度診所嚟喎？你係咪咁後生就有老花啦～
我：「我哋呢度唔係急症啊」
佢：「咁你可唔可以SEND我過去急症呀？」
好呀，我CLICK個ENTER制就SEND咗過去㗎啦。你攝唔攝到入個ENTER制度呀？
我：「我哋冇呢個服務…你可以出去搭車去醫院嘅」
佢：「咁你呢度唔睇我唔醫我㗎啦？如果唔睇嘅係咪可以幫手車我去？」
係你一開始就嫌棄我哋先啊。你唔介意嘅我可以送埋你上火星添～
我：「唔係啦～如果你要睇醫生可以嘅，不過見你頭先一嚟就話要急症嘛…你睇醫生嘅麻煩你俾身分證我登記先啊。」
佢：「即係睇定唔睇呀？」
施主，呢個問題應該問返你自己。
我：「你睇定唔睇醫生呀？睇就俾身分證我啊～」
佢：「如果你哋醫得到我，我唔介意睇囉」
如果醫腦嘅話，你都係去另請高明啦。
我：「你想睇啲咩呀？」
佢舉起手指：「我頭先剪到」
…..即係你因為嗰一忽仔流血，所以想去急症呀？我想打到你個頭爆晒缸先，咁去急症會好啲。
我：「咁小事…冇問題呀。仲可以打埋破傷風針呀～」
佢：「吓？要打針？打一針呀？」
我：「唔係，前後夾埋要打三針，不過係分開打嘅，今日就打住一針先。你把鉸剪如果唔乾淨嘅，打咗針就穩陣好多，有十年效啊。」
佢：「我呢度流少少血就要打三針？」
你終於醒覺你手指係好小問題啦？
我：「因為只打一針係冇咩大效，打三針為一個療程」
