冤枉!其實唔想樓市升 @ 沒有炒家  樓價更貴(中)

冤枉!其實唔想樓市升 @ 沒有炒家 樓價更貴(中)

朋友:「點先算係炒賣?」

筆者:「短線買賣獲利,賺取的差價需要繳稅。」

朋友:「咁點先算投資呢?」

筆者:「長線持有收租,資產增值部份,在香港毋須繳稅。」

朋友:「你憑咩咁講先?」

筆者:「唔係我講架,會計師話呢個係稅局解釋。」

朋友:「上星期篇文你話『冇炒家樓價更貴』,好多人唔同意!」

筆者:「正常,的確係違反正常思維。」

朋友:「所以政府、政客就算明白,都唔敢撤招?」

筆者:「係呀!佢哋選擇不斷加辣,反效果,越升越急。」

上星期的文章《沒有炒家 樓價只會更貴》刊出後,引來不少迴響。其實沒所謂同意與否,這不是一個見解,而是一個真實存在的社會現象,自從2010年額外印花稅(SSD)之後,炒家銷聲匿跡,樓價卻愈升愈急,筆者只是引述前輩分析,嘗試解釋這個現象而已。

高價沽 絕對可以買更大單位

簡述前輩分析,從「賣出價」來說,炒家貨多,賺少啲冇所謂,做多兩單一樣,用家只有一件貨,唔賺盡就冇機會,叫價亦會比炒家高。很多網友不理解,其中用家高價賣樓部份,值得解說。

網友: 「個個做同一樣嘢,水漲船高啫,錢何來賺?」

網友: 「用家賺到盡又點?出面啲樓貴晒,點買返?」

網友: 「賣咗樓之後,根本唔可以係同區買返一樣大的單位!」

當然唔會買唔返,分分鐘可以買大啲添!例如你之前用200萬元買咗層樓,升到300萬元,賣咗層樓之後,發現之前賣300萬元的樓,升到400萬元,驟眼睇以為追唔到,實際上是:

– 幾年前200萬元買入的單位,假設做九成按揭,首期20萬元;

– 樓價升到300萬元,賣出物業之後,可取回100萬+20萬=120萬元;

– 買一個400萬元物業,做九成按揭,首期只需40萬元;

– 即使買450萬元物業,做八成按揭,首期只需90萬元。

你手上有120萬元,只需要付出90萬元就可以住大啲,點解唔得?

網友:「買入超過一個物業,等升值後賣出賺錢,都是炒家!」

筆者:「一人一個物業?如果有人買唔起,邊個租樓俾佢?」

筆者:「其實今時今日,很多投資者都唔想樓市升!」

#炒家已鳴金收兵

首先,如果樓市不斷上升,根本買唔到貨。就好似今時今日的樓價,很多投資者朋友早一兩年賣咗樓,冇即時買返,樓價不斷咁升,件件貨都買唔落手,得個睇字。

換句話說,賺完一轉之後,很難再賺第二轉,有乜意思?如果說,未上車的用家希望樓價跌,我們投資物業的,更希望見到樓價跌。只有狠狠地跌一次,投資者才有機會大舉出搫。

其次,如果樓市不斷上升,只會令政府再出招。看網友的反應就明白,普遍市民不理解,政府亦轉移視線,將茅頭指向炒家,這幾年間加辣又加辣,不但炒家,甚至投資者很多都覺得冇乜好玩,早已經鳴金收兵。想不到那麼多市民,仍然將今時今日的樓價升幅,算到炒家頭上。

朋友: 「個市係咁升,你哋最開心啦!」

筆者: 「冤枉呀!大老爺!其實我哋唔想樓市係咁升!」

朋友: 「咪吹水喎!樓市唔升,炒家邊賺到錢?」

前輩分享,當年市靜,整體樓價冇乜方向,反而最容易賺到錢,捕捉每年的高低位,就好似股市上落市,低於市價一兩成買入,包裝一番,再高於市價一兩成賣出,又唔會有政策打壓,反而長做長有。

其實,筆者真係好想樓價跌……

相關文章